ՀՀ երրորդ նախագահ Սերժ Սարգսյանի եղբորորդին՝ Նարեկ Սարգսյանն առողջական խնդիրներ ունի։ Այս մասին NEWS.am-ին հայտնեց նրա պաշտպան Արթուր Պիվազյանը։
Պաշտպանը չցանկացավ մանրամասնել, թե առողջական ինչ խնդիրներ ունի Նարեկ Սարգսյանը։
«Ով էլ երկար ժամանակ նման վայրերում գտնվի՝ նման խնդիր կունենա»,- ասաց պաշտպանը։
Նա հայտնեց, որ բողոքարկել էր Վերաքննիչ քրեական դատարան՝ Նարեկ Սարգսյանի նկատմամբ կալանավորումն ընտրելու որոշման դեմ, սակայն Վերաքննիչ դատարանը մերժել է պաշտպանի բողոքը։ Ըստ պաշտպանի՝ կալանավորման որոշումը չհիմնավորված է։
Պիվազյանն ասաց, որ պատրաստվում են Վճռաբեկ դատարան նույնպես բողոք ներկայացնել։
Պաշտպանը հայտնեց, որ Նարեկ Սարգսյանի տեսակցությունը մասամբ է բաց․
«Միջնորդում ենք վարույթն իրականացնող մարմին ու տվյալ անձը կարողանում է տեսակցել Նարեկ Սարգսյանին»։
Հիշեցնենք, որ դեկտեմբերի 21-ին Ոստիկանության ծառայողների ուղեկցությամբ Նարեկ Սարգսյանը Չեխիայից տեղափոխվել է Հայաստան։ Նրա նկատմամբ միջազգային հետախուզում էր հայտարարվել դեռեւս մեկ տարի առաջ։
Անցած տարի դեկտեմբերի 6-ին Նարեկ Սարգսյանը «Ինտերպոլ»-ի աջակցությամբ հայտնաբերվեց Պրահայում ու ձերբակալվեց:
Ըստ Ոստիկանության պաշտոնական հաղորդագրության, Սարգսյանը ներկայացել էր Գվատեմալայի քաղաքացու կեղծ անձնագրով՝ Ֆրանկլին Գոնսալեսի անձնական տվյալներով։ Ձերբակալվելուց ուղիղ մեկ տարի անց, Չեխիան բավարարել էր Նարեկ Սարգսյանին Հայաստանին հանձնելու միջնորդությունը։ Նախորդ տարվա հունիսի 26-ին Ազգային անվտանգության ծառայությունում Նարեկ Սարգսյանի նկատմամբ հարուցվել էր քրեական գործ՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելու, իրացնելու, պահելու, փոխադրելու կամ կրելու եւ թմրամիջոցների, հոգեմետ (հոգեներգործուն) նյութերի եւ դրանց պրեկուրսորների ապօրինի շրջանառությունն իրացնելու կամ պատրաստելու նպատակով կամ դրանց ապօրինի իրացնելու հատկանիշներով:
