Կարսի հայ-թուրքական բարեկամության արձանի ապամոնտաժման դեմ բողոքի երթ կազմակերպելու նպատակով թուրք հայտնի նկարիչ Բեդրի Բայքամն իր ընկերների հետ ժողովի է մասնակցել։ Ժողովից դուրս գալու ընթացքում նրան եւ նրա ասիստենտին դանակահարել են։
Վիրավորված նկարիչը փողոցում րոպեներով օգնություն է կանչել, սակայն ոչ մի մեքենա չի փորձել օգնել արյունաթաթախ նկարչին։
Բայքամը ավելի ուշ կարողանում է մի տաքսով հիվանդանոց հասնել։
Հայտնի է դարձել, որ Ստամբուլի «Աքաթլար» մշակույթային կենտրոնում կազմակերպվել էր հանդիպում, որի ընթացքում քննարկվել է Կարսի հայ-թուրքական բարեկամության հուշարձանի ապամոնտաժման դեմ ապրիլի 23-ին բողոքի երթ իրականացնելու հարցը։
Հանդիպման ժամանակ Բեդրի Բայքամը քննադատել է Թուրքիայի վարչապետ Ռեջեփ Թայիփ Էրդողանին՝ արվեստի գործը «հրեշավոր» անվանելու եւ այն քանդելու որոշման համար։
Ստամբուլի ոստիկանապետն անմիջապես այցելել է հիվանդանոց, որտեղ լրագրողներին հայտնել է, թե հանցագործին արագ ձերբակալելու են, քանի որ իրենց մոտ ապացույցներ կան։
Ականատեսները նշել են, որ հանցագործը եղել է 30-35 տարեկան, մոտ 170 սմ հասակով եւ ձեռքին ունեցել մեծ դանակ։ Նա դանակով հարվածելուց հետո նստել է մեքենա եւ հեռացել։
