Իրանը պատրաստ է որպես միջնորդ հանդես գալ Իդլիբում իրավիճակի համատեքստում Թուրքիայի եւ Սիրիայի քաղաքական տարաձայնությունների կարգավորման գործում: Այս մասին ՄԱԿ ԱԽ նիստում ելույթ ունենալիս ասել է ՄԱԿ-ում Իրանի մշտական ներկայացուցիչ Մաջիդ Թահթ-Ռավանչին, փոխանցում է «ՌԻԱ Նովոստի»-ն:
«Լինելով Աստանայի ձեւաչափի երաշխավորներից մեկը՝ Իրանը պատրաստ է որպես միջնորդ հանդես գալ, որպեսզի իր ավանդը բերի Թուրքիայի եւ Սիրիայի միջեւ Իդլիբում իրավիճակին առնչվող ներկայիս տարաձայնությունների քաղաքական կարգավորման գործում: Աստանայի ձեւաչափի երաշխավորների առաջիկա գագաթնաժողովը, որը մոտ ապագայում պետք է անցկացվի Թեհրանում, Սիրիայի իրավիճակի համապարփակ քննարկման էական հնարավորություն է»,- ասել է Թահթ-Ռավանչին:
Երկուշաբթի Թուրքիայի պաշտպանության նախարարությունը հայտնել էր, որ 5 թուրք զինծառայողներ եւ քաղաքացիական անձնակազմից մեկ աշխատակից զոհվել են Իդլիբում սիրիական կառավարական բանակի գնդակոծության ժամանակ: Այնուհետեւ Թուրքիայի նախագահ Թայիփ Էրդողանը հայտարարել էր, որ զոհվել են 5 զինվորականներ եւ 3 քաղաքացիական անձինք:
Թուրք առաջնորդն ավելի ուշ հայտարարել էր, որ իր ռուս գործընկեր Վլադիմիր Պուտինին կոչ է արել ճնշում գործադրել Սիրիայի նախագահ Բաշար Ասադի վրա, որպեսզի սիրիական բանակը Իդլիբ նահանգում հարձակումը դադարեցնի եւ փետրվարին հետ քաշվի թուրքական դիտակետերից՝ հակառակ դեպքում սպառնալով ռազմական պատասխանով:
