ՍԴ դատավորների հեռանալը ոչ նահանջ է, ոչ պարտություն, պարզապես անհրաժեշտություն է, որը գիտակցելը շատ ավելի մեծ արժանապատվություն է, քան առժամանակ դիմադրելը։ Այս մասին այսօր՝ փետրվարի 7-ին, ֆեյսբուքյան իր էջում գրառում է արել ՀՀ նախկին վարչապետ Արամ Սարգսյանը։
Գրառման մեջ, մասնավորապես, ասվում է.
«Հարգելի ՍԴ դատավորներ, 2018-ին Հայաստանում քաղաքական իրավիճակի, օրենսդիր եւ գործադիր իշխանության փոփոխություններից հետո, հաշվի առնելով տասնամյակներով Սահմանադրական դատարանի գործունեությունից հանրության մեջ ձեւավորված իրավացի բացասական վերաբերմունքը, գտնում եմ, որ քաղաքական անհրաժեշտություն է ՍԴ նոր կազմ ունենալը, որում չի բացառվում նաեւ ձեզնից ոմանց ներկայությունը, ինչպես գործադիր ու դատական իշխանության մեջ շարունակում են պաշտոնավարել շատերը:
Իշխանությունը փորձեց հնարավորը՝ անգամ հանրային ընկալումներում խոցելի առաջարկների միջոցով ձեզ ինքնակամ հեռանալու հնարավորություն ընձեռելով։ Դուք այսօր էլ ունեք այդ հնարավորությունը՝ երկիրը չկանգնեցնել ակնհայտ արդյունքով երկընտրանքի առաջ, եւ արժանապատիվ հեռանալ։ Հայաստանում գործող գրեթե բոլոր եւ ԱԺ-ում ներկայացված 3 կուսակցություններն էլ կողմ են ՍԴ կազմի փոփոխությանը, դեմ են միայն փոփոխության ձեւերին։
Ձեր մնալուն կողմ են նախկինները, որ քաղաքական իրավիճակը ճիշտ գնահատելով հեռացան, բայց ձեզ հորդորում են մնալ մի խրամատում, որից իրենք առաջինը դուրս եկան: Հասկանալով նաեւ ձեր անձնական կյանքին խառնվելու, ոստիկանական մեթոդներով ձեզ որոշում պարտադրելու մեթոդներից ձեր բնական վիրավորվածությունն ու նեղացածությունը, այնուամենայնիվ, գտնում եմ, որ պետությունը արհեստական հակադրությունից եւ ցնցումներց հետ պահելու գիտակցությունը գերակշռող կլինի։ Ձեր հեռանալը ոչ նահանջ է, ոչ պարտություն, պարզապես անհրաժեշտություն է, որը գիտակցելը շատ ավելի մեծ արժանապատվություն է, քան առժամանակ դիմադրելը»։
