Ադրբեջանում ԱՄՆ դեսպանությունը հայտարարությամբ է հանդես եկել Ադրբեջանում փետրվարի 9-ին անցկացված խորհրդարանական ընտրությունների վերաբերյալ, փոխանցում է Turan.az-ը:
Դեսպանությունն արձանագրել է, որ ԵԱՀԿ ԺՀՄԻԳ դիտորդական առաքելությունը հայտնել է փետրվարի 9-ի ընտրությունների առիթով իր դիտարկումների եւ մտահոգությունների մասին, որոնք անցկացվել են սահմանափակող օրենսդրական եւ քաղաքական միջավայրում, որը խոչընդոտել է իրական մրցակցությանը: «Այս ընտրությունները նշանավորվել են մամուլի եւ հավաքների ազատության սահմանափակմամբ»,- նշում են դեսպանությունից:
Այնուհետեւ հայտարարության մեջ նշված է, որ Ադրբեջանը խոստացել է հնարավորինս արագ քննել ընտրական գործընթացի ժամանակ տեղ գտած խախտումները: «ԺՀՄԻԳ զեկույցը ցույց է տալիս, որ տեղ են գտել բազմաթիվ խախտումներ: Քննությունը եւ ԵԱՀԿ ԺՀՄԻԳ նախորդ եւ ապագա հանձնարարականների կատարումը Ադրբեջանի պարտավորությունն են որպես ԵԱՀԿ անդամի եւ, ինչն ավելի կարեւոր է, ադրբեջանցի ժողովրդի առաջ»:
ԱՄՆ դեսպանությունը հայտարարության վերջում ընդգծում է իր հանձնառությունը Ադրբեջանի կառավարության եւ ժողովրդի հետ համագործակցությանը՝ ուժեղ, կայուն, ժշողովրդավարական եւ բարգավաճ ապագայի ապահովման նրանց ջանքերում: