Microsoft-ը մշակողների համար օպերացիոն համակարգի Windows 10X էմուլյատոր է թողարկել։ Օպերացիոն համակարգը նախատեսված է երկու դիսփլեյով կամ ծալվող էկրանով սարքավորումների համար, հայտնում է Lenta-ն՝ հղում կատարելով The Verge-ին։
Ընկերությունը համակարգը թողարկել է մշակողների համար, որպեսզի նրանք կարողանան մինչեւ ավարտական ռելիզը թեսթավորել իրենց հավելվածները նորացված ինտերֆեյսում։ Թերթը հայտնում է, որ Windows 10X-ը ստացել է նոր եւ պարզեցված դիզայն, «Մեկնարկ»-ի նոր մենյու եւ հավելվածների համար երկու ակտիվ հատվածներ։ Նաեւ համակարգում անհետացել են սալիկային գործառույթները, որոնք կային Windows 10-ում եւ ավելի վաղ օպերացիոն համակարգերում։
Windows 10X-ը կառուցված է հաշվի առնելով երկու դիսփլեյները, որոնց վրա կարելի է մեկ կամ մի քանի հավելված բացել։ Առաջին էկրանին կարելի է բացել տեքստային խմբագրիչը, իսկ երկրորդի վրա՝ բրաուզերը, լուսանկարները կամ մեդիաձայնարկիչը։ Բացի այդ, տեքստ հավաքելիս վիրրտուալ ստեղնաշարը տեղադրվում է էկրաններից մեկի վրա։ Թերթը նշում է, որ համակարգը դիսփլեյի ամբողջ տարածքը չի զբաղեցնում՝ ակտիվ հատված թողնելով լրացուցիչ հավելվածների համար։
Էկրանների ներքեւի մասում տեղադրվում է Wonder Bar-ը՝ հատուկ վահանակ, որի վրա կարելի է տեղադրել հավելվածների, կատալոգների, հաճախ օգտագործվող ֆայլերի պիտակները։ Ծրագրերի մի մասը կարող է գործարկվել «պատկերը պատկերում» ռեժիմով, որը կլինի բոլոր պատուհանների վերին մասում։
Փետրվարի 11-ին հայտնի է դարձել, որ Microsoft-ը փնտրում է մասնագետներ, որոնք կաշխատեն Windows 10X-ում ձայնային կառավարման համակարգի վրա։ Ընկերության ծրագրերի համաձայն, ձայնային օգնականի միջոցով ՕՀ-ում կարելի կլինի կառավարել աշխատանքային սեղանի եւ հավելվածների գործառույթները։
