ԱՄՆ պետքարտուղար Մայք Պոմպեոն հայտարարել է, թե ինքը «վրդովված է» ՄԱԿ-ի կողմից՝ Արեւմտյան ափի իսրայելական բնակավայրերի հետ կապված ընկերությունների ցուցակի հրապարակումից, որոնց մեղադրել են պաղեստինցիների իրավունքները խախտելու մեջ, հայտնում է AP-ը։
Պոմպեոյի խոսքերով՝ ցուցակը սատարում է պաղեստինցիների կողմից ղեկավարվող բոյկոտը եւ «ապալեգիտիմացնում» Իսրայելին։ Նա այլ երկրներին կոչ է արել այդ ջանքերի մերժման հարցում միանալ ԱՄՆ-ին։
«Միացյալ Նահանգները արդեն վաղուց հանդես են գալիս այդ տվյալների բազայի ստեղծման կամ հրապարակման դեմ,- ասել է Պոմպեոն,- Դրա հրապարակումը միայն հաստատում է չթուլացող հակաիսրայելական հակվածության մասին, որն այդքան տարածված է ՄԱԿ-ում»։
Նախօրեին ՄԱԿ-ի կողմից հրապարակված ցուցակում 112 ընկերություններ են, որոնք, մարդու իրավունքների ՄԱԿ դեպարտամենտի խոսքերով, մասնակից են իրավունքների խախտումներին եւ աջակցում են իսրայելական բնակավայրերին՝ գրավված Արեւմտյան ափին եւ Իսրայելի կողմից անեքսիայի ենթարկված արեւելյան Երուսաղեմում։
Ցուցակում գերիշխում են իսրայելական ընկերությունները, այդ թվում խոշոր բանկեր, շինարարական ընկերություններ, սուպերմարկետներ եւ ավտոլցակայաններ։ Սակայն դրանում նաեւ ներառված են մի շարք համաշխարհային բրենդներ, այդ թվում՝ ամերիկյան Airbnb-ը, General Mills-ը եւ Motorola Solutions-ը։