Հայաստանը մեծ շանս ունի էապես ավելացնելու Ռուսաստանից զբոսաշրջիկների հոսքը: Այսօր` ապրիլի 19-ին նման հայտարարություն արեց ՌԴ Զբոսաշրջության դաշնային գործակալության պետի պաշտոնակատար Ալեքսանդր Ռադկովը` Երեւանում ելույթ ունենալով զբոսաշրջությանը նվիրված կլոր սեղանի ժամանակ` հայ-ռուսական բիզնես-ֆորումի շրջանակներում:
Ա. Ռադկովի խոսքով` ռուսների նախընտրած ավանդական զբոսաշրջային ուղղությունները` Եգիպտոսն ու Թուրքիան, «դեպրեսիվ» վիճակում են, քանի որ ռուսների մոտ մեծացել է հետաքրքրությունը կուլտուր-ճանաչողական զբոսաշրջության նկատմամբ: «Ռուսաստանում կլիման ցուտ է, արեւն ու ծովը միշտ էլ պահանջարկված են, բայց մարդիկ չեն ցանկանում անընդհատ նույն վայրերը մեկնել: Հիմա ռուսների մոտ մեծացել է հետաքրքրությունը կուլտուր-ճանաչողական զբոսաշրջության նկատմամբ, ու Հայաստանը մեծ շանս ունի ամենաբարձր տեղը գրավելու ռուս զբոսաշրջիկների ընդունման հարցում»,- ասաց Ա. Ռադկովը:
Հայաստանում, մասնավորապես, հետաքրքրություն են ներկայացնում կրոնական, լեռնադահուկային, կուլտուր-ճանաչողական ուղղությունները: Սակայն ռուսների մոտ հետաքրքրություն ստեղծելու նպատակով, ըստ Ա. Ռադկովի, ռուսական շուկայում պետք է ստեղծել «հայկական բրենդը»: Դա պետք է անեն քաղաքական գործիչները, հայկական որակյալ ապրանքները, մշակույթի ներկայացուցիչները: Ինքը, ռուս պաշտոնյան, խոստացավ Հայաստանի օգտին Ռուսաստանում լոբբինգ իրականացնել:
