Փաշինյանը ցրել է Հայաստանի օրակարգում Ադրբեջանի կողմից Արցախի Շահումյանի շրջանի օկուպացիայի հարցի բացակայության հետ կապված կասկածները: Այս մասին այսօր ԱԺ ավանդական ճեպազրույցի ժամանակ հայտարարեց «Իմ քայլի» պատգամավոր Տաթեւիկ Հայրապետյանը՝ մեկնաբանելով Նիկոլ Փաշինյանի բեռլինյան հայտարարությունները: Նա նկատեց, որ նախկինում բազմիցս հնչել են մտահոգություններ, դժգոհություններ՝ կապված այդ հարցում Հայաստանի ղեկավարության լռության հետ:
«Իմ կարծիքով՝ Հայաստանի վարչապետն այդ հարցում վերջակետ դրեց: Հայաստանն առաջին անգամ պետության ղեկավարի մակարդակով Բեռլինում բարձրացրեց Ադրբեջանի կողմից Շահումյանի օկուպացիայի հարցը: Այդ մասին լռում էին նախորդ իշխանությունները»,- ասաց նա:
Նշենք, որ երեկ Բեռլինում «Հայաստան-Գերմանիա. տեւական համագործակցություն նոր նախանշանների ներքո» խորագրով քննարկումների ժամանակ պատասխանելով ադրբեջանցի մասնակցի հարցին՝ Հայաստանի վարչապետը հավաքվածներին հիշեցրեց Ադրբեջանի կողմից Շահումյանի շրջանի օկուպացիայի փաստի մասին:
