ԱՄՆ նախագահ Դոնալդ Թրամփը Twitter-ի իր միկրոբլոգում նշել է, որ քրեական գործերին միջամտելու օրինական իրավունք ունի:
Նա այս կերպ մեկնաբանել է ԱՄՆ գլխավոր դատախազ Ուիլյամ Բարրի ավելի վաղ կատարած հայտարարությունը, որի խոստովանությամբ՝ նախագահի թվիթներն իրեն խանգարում են աշխատել:
«Նախագահն ինձ երբեք չի խնդրել քրեական գործերում ինչ-որ բան անել»,- ասել էր գլխավոր դատախազ Բարրը: «Դա չի նշանակում, որ ես՝ որպես նախագահ, դա անելու օրինական իրավունք չունեմ: Ունեմ, բայց մինչեւ հիմա անհրաժեշտ եմ համարել դա չանել»,- նշել է Դոնալդ Թրամփը:
Սեփական աղբյուրին վկայակոչելով՝ Reuters-ը հայտնում է, որ Բարրը մասնավոր կարգով Թրամփին ասել է, որ նախագահի թվիթները դժվարեցնում են իր կողմից երկրի արդարադատության նախարարության ղեկավարումը:
Բարրն ավելի ուշ ABC հեռուստաալիքի հետ հարցազրույցում ասել էր, որ Թրամփի հարձակումներն իր աշխատանքն «անհնարին» են դարձնում: «Ժամանակն է թվիթներ գրելը դադարեցնել»,- հավելել էր նա:
