Պատգամավորների հանդիպումը ՀՀ Զինված ուժերի Գլխավոր շտաբի պետ Արտակ Դավթյանի հետ արդյունավետ էր եւ բովանդակալից: Այս մասին այսօր լրագրողների հետ հանդիպման ժամանակ հայտարարեց «Բարգավաճ Հայաստանի» պատգամավոր Նաիրա Զոհրաբյանը:
Նրա խոսքով՝ մտահոգություն առաջացնող շատ հարցեր ստացել են իրենց պատասխանները: «Մենք որպես օրենսդիր մարմին դեռ շատ անելիքներ ունենք: Հստակ պայմանավորվածություններ ենք ձեռք բերել ԶՈւ ԳՇ-ի հետ համագործակցության մասին»,- ասաց պատգամավորը:
Իր հերթին, «Իմ քայլի» պատգամավոր Անդրանիկ Քոչարյանը նշեց, որ քննարկված հարցերն ունեն գաղտնիության բարձր մակարդակ: «Մենք պետք է հաշվի առնենք, որ Զինված ուժերում միջադեպերը մեզ ստիպում են անել ամեն ինչ բանակի համար: Այսօր բանակը չպետք է թիրախ դառնա: Բոլորս պետք է կանգնած լինենք բանակի կողքին»,- ասաց Քոչարյանը, ով ավելի վաղ բազմիցս խոսել է բանակում կոռուպցիայի մասին եւ քննադատել հրամանատարությանը:
Հիշեցնենք, որ այսօր Ազգային ժողովում կայացել է ԱԺ Մարդու իրավունքների պաշտպանության եւ հանրային հարցերի մշտական հանձնաժողովի եւ ԱԺ Պաշտպանության եւ անվտանգության հարցերով մշտական հանձնաժողովի նիստը, որին մասնակցել է ՀՀ ԶՈւ ԳՇ պետ Արտակ Դավթյանը: Տարեսկզբիվ ՀՀ ԶՈւ-ում եւ ԼՂՀ Պաշտպանության բանակում ոչ մարտական պայմաններում զոհվել է 13 զինծառայող: Մի քանի դեպքի փաստով քրեական գործ է հարուցվել «ինքնասպանության հասցնելու» հոդվածով:
