«Ֆլեշ» ընկերության սեփականատեր Բարսեղ Բեգլարյանը եւ Գյուղատնտեսության նախկին նախարար Սերգո Կարապետյանը դիզվառելիքի գործով առերեսվել են: Այս մասին այսօր՝ փետրվարի 18-ին, լրագրողների հետ զրույցում ասաց Բեգլարյանի պաշտպանը։
Պաշտպանը կրկին շեշտեց, որ առաջադրված մեղադրանքն անհիմն է. «Հափշտակություն, իմ համոզմամբ, գոյություն չունի»։
Հարցին՝ արդյոք Բարսեղ Բեգլարյանի դեմ ցուցմունք տված անձ կա՞, պաշտպանն ասաց. «Կան որոշակի ցուցմունքներ, որոնց վրա մեղադրական կողմը հենվում է, բայց դրանք անհիմն են»։
Հարցին՝ միայն Սերգո Կարապետյանի ցուցմունքի հիման վրա՞ է մեղադրանք առաջադրվել, պաշտպանն ասաց՝ «բացառապես»։
Նա հայտնեց, որ Բեգլարյանն ու Կարապետյանն առերեսվել են. «Սերգո Կարապետյանը պնդել է, իսկ Բարսեղ Բեգլարյանը հերքել»։
Հիշեցնենք, որ հունվարի 10-ին քրեական գործի նախաքննությունն ավարտվել էր: Օրեր անց Հատուկ քննչական ծառայությունը հայտնել էր, որ գործը մեղադրական եզրակացությամբ հանձնվել է հսկողություն իրականացնող դատախազին՝ այն դատարան ուղարկելու միջնորդությամբ: Քրեական գործով մեղադրյալի կարգավիճակում է 5 անձ: Նրանցից 4-ին՝ Սերժ Սարգսյանին, Բարսեղ Բեգլարյանին, գյուղատնտեսության նախկին փոխնախարար Սամվել Գալստյանին եւ նույն նախարարության Բուսաբուծության վարչության պետ Գեւորգ Հարությունյանին մեղադրանք է առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով (առանձնապես խոշոր չափերով յուրացումը կամ վատնումը կազմակերպել, դրդելը, օժանդակելը), իսկ գյուղատնտեսության նախկին նախարար Սերգո Կարապետյանին՝ 179-րդ հոդվածի 3-րդ մասի 1-ին կետով (առանձնապես խոշոր չափերով յուրացումը կամ վատնումը):
Ըստ ՀՔԾ հաղորդագրության՝ իրենց վարույթում քննվող քրեական գործի նախաքննության ընթացքում ձեռք բերված բավարար ապացույցների համակցության հիման վրա պարզվել է, որ ՀՀ երրորդ նախագահ Սերժ Սարգսյանի կազմակերպմամբ եւ «Ֆլեշ» ՍՊ ընկերության սեփականատեր Բարսեղ Բեգլարյանի դրդմամբ, ՀՀ նախկին գյուղատնտեսության նախարարի տեղակալ Սամվել Գալստյանի ու նույն նախարարության բուսաբուծության վարչության պետ Գեւորգ Հարությունյանի օժանդակությամբ, ՀՀ նախկին գյուղատնտեսության նախարար Սերգո Կարապետյանի կողմից 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15.391.765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489.160.310 ՀՀ դրամը:
