Հյուսիսային Մակեդոնիան եւ Ալբանիան կարող են իրականացնել այն բարեփոխումները, որոնք անհրաժեշտ են Եվրամիությանն անդամակցելու համար: Այս մասին հայտարարել է Եվրամիության ընդլայնման հարցերով հանձնակատար Օլիվեր Վարհելին, փոխանցում է Reuters-ը:
Ֆրանսիայի նախագահ Էմանուել Մակրոնը, որը արգելափակել էր Սկոպիայի եւ Տիրանայի հետ բանակցությունների մեկնարկը հոկտեմբերին, հայտարարել է, որ պատրաստ է հանել վետոն, եթե Եվրահանձնաժողովը դրական կարծիք հայտնի:
«Ես շատ ոգևորված են երկու երկրներ իմ այցերով»,- ասել է Օլիվեր Վարհելին: «Նրանք չեն հրաժարվում բարեփոխումներից, եւ դուք կտեսնեք, որ դրանք արդյունքներ կտան, եւ եթե նրանք դա անեն, կարող եք վստահ լինել, որ բանակցությունները կսկսվեն»:
Եթե թույլատրվի շարունակել անդամակցության բանակցությունները, ապա դա հող կպատրաստի մայիսին Զագրեբում ԵՄ առաջնորդների եւ Արևմտյան Բալկաններում բոլոր վեց թեկնածու երկրների` Սերբիայի, Կոսովոյի, Մոնտենեգրոյի, Ալբանիայի, Բոսնիայի եւ Հյուսիսային Մակեդոնիայի հետ գագաթնաժողովին:
Ավելի վաղ ելույթ ունենալով Մյունխենի անվտանգության համաժողովին` Մակրոնը եվրոպական առաջնորդներին հավաստիացրել էր, որ Ֆրանսիան, այնուամենայնիվ, դեռ կողմ է ԵՄ ընդլայնմանը:
Մակրոնը հրաժարվել էր հաստատել, այսպես կոչված, անդամակցման բանակցությունների սկիզբը հոկտեմբերին կայացած գագաթնաժողովին՝ հայտարարելով, որ նոր անդամների ընդունման գործընթացը պետք է փոխվի:
Փետրվարին Եվրահանձնաժողովը առաջարկել էր բարեփոխել անդամակցության գործընթացը` ֆրանսիական առաջարկին համապատասխան:
Ակնկալվում է, որ Դանիան եւ Նիդեռլանդները, որոնք աջակցում են Մակրոնին, կթուլացնեն իրենց դիմադրությունը, Reuters-ին հայտնել են ԵՄ դիվանագետները: