Ֆրանսիայի իշխանությունները փակում են Գերմանիայի հետ սահմանին գտնվող Ֆեսենհայմի միջուկային համալիրը: Այն կփակվի հունիսի վերջին, իսկ դրա ռեակտորներից մեկը կփակվի այս հանգստյան օրերին,փոխանցում է AP-ն:
Երկրի վարչապետ Էդուարդ Ֆիլիպի հայտարարության մեջ այս որոշումը որակվել է որպես Ֆրանսիայի էներգետիկ ռազմավարության «առաջին փուլ», որը նախանշվել էր 2018 թվականին նախագահ Էմանուել Մակրոնի կողմից: Հայտարարության մեջ նշվում է, որ ածուխի գործարանները պետք է փակվեն մինչև 2022 թվականը` ջերմոցային գազերի արտանետումները նվազեցնելու համար: Նաեւ նշվում է, որ №1 ռեակտորը կկանգնեցվի շաբաթ օրը, իսկ ամբողջ համալիրը` հունիսի 30-ին:
Գերմանիան վաղուց էր կոչ անում փակել Ֆրանսիայի ամենահին ատոմակայանը: Սա առաջին միջուկային համալիրն է, որը կփակվի Մակրոնի պլանի համաձայն: 2018 թվականին Մակրոնը, ուրվագծելով Ֆրանսիայի էներգետիկ ռազմավարությունն առաջիկա 30 տարիներին, հայտարարել էր, որ մինչև 2035 թվականը 19 կայաններում գործող 58 միջուկային ռեակտորներից 14-ը կփակվեն:
