Ավստրալիայում ռեգբիի նախկին խաղացող Ռոուեն Բաքսթերը եւ նրա երեք երեխաները այրվել են ավտոմեքենայի մեջ՝ ենթադրաբար հրկիզման հետեւանքով, հայտնել է ոստիկանությունը: Ստացած այրվածքներից հետո մահացել է նաեւ նրա կինը: Ողբերգությունը տեղի է ունեցել ավստրալական Բրիսբեն քաղաքում, փոխանցում է BBC-ն:
Ոստիկանության տեղեկացմամբ՝ երեխաները 10 տարեկանից փոքր էին: Հաղորդվում է, որ Բաքսթերի կինը մեքենայից դուրս է ցատկել՝ բղավելով. «Նա ինձ վրա բենզին լցրեց»: Նա ծավալուն այրվածքներ է ստացել եւ ավելի ուշ հիվանդանոցում մահացել է: «Հրեշավոր պատկեր է,- լրագրողներին ասել է քրեական ոստիկանության տեսուչ Մարկ Թոմփսոնը: - Հետաքննությունը նոր է սկսվել, բայց ոստիկանների գալու պահին ավտոմեքենան ամբողջությամբ կրակի մեջ էր»:
Ոստիկանությունը ահազանգը ստացել է տեղական ժամանակով 08:30-ին: Ժամանելուց հետո ոստիկաններն այրված ավտոմեքենայի մեջ հայտնաբերել են 42-ամյա Բաքսթերի եւ նրա երեք՝ 6, 4 ու 3 տարեկան երեխաների մարմինները:
Ոստիկանության տեղեկություններով՝ կատարվածից առաջ Ռոուեն Բաքսթերը եղել է առջեւի ուղեւորի նստատեղին, իսկ նրա կինը ղեկին էր:
Տեղացիները լրատվամիջոցներին հայտնել են, որ կրակով բռնկված Հաննա Բաքսթերը դուրս է ցատկել ավտոմեքենայից: Նրան կրիտիկական վիճակում տեղափոխել են Բրիսբենի հիվանդանոց, որտեղ մահացել է այրվածքների հետեւանքով:
Դեպքի վայր ժամանած բժիշկները օգնություն են ցուցաբերել պատահական անցորդի, որը փորձել է փրկել մեքենայի մեջ եղած մարդկանց: Նա այրվածքներ է ստացել դեմքին եւ նույնպես հոսպիտալացվել է:
