Հակակոռուպցիոն պայքարն ավելի արդյունավետ դարձնելու եւ շատ ավելի մեծ գումարներ պետական բյուջե վերադարձնելու թեմայով վերջին շրջանում քննարկումներ ունեցել ենք եւ շարունակում ենք ունենալ իրավապահ համակարգի ներկայացուցիչների հետ եւ դա լինելու է առաջիկա մեր ամենակարեւոր խնդիրներից մեկը: Այս մասին այսօր՝ փետվարի 20-ին, Կառավարության նիստի ժամանակ նշեց վարչապետ Նիկոլ Փաշինյանը:
«Ես ուզում եմ հիշեցնել, որ 2018 թվականի նախընտրական գործընթացի ընթացքում ես արել եմ հետեւյալ քաղաքական հայտարարությունը, որ առաջիկա հինգ տարիների ընթացքում մենք պետք է 2,5 մլրդ դոլար հավելյալ միջոցներ ծախսենք մեր անվտանգության կարիքների վրա, մասնավորապես Զինված ուժերի մարտունակության եւ սպառազինության մակարդակը բարձրացնելու համար եւ այդ 2,5 մլրդ դոլարից 1,5-ը պետք է գոյանա հակակոռուպցիոն արդյունավետ պայքարի միջոցով, այդ թվում գողացված միջոցների հետբերման գործընթացի միջոցով»,-ասաց Փաշինյանը:
Նա հարց ուղղեց, թե արդյո՞ք այս պահի դրությամբ իրեն գոհացնում եւ բավարարում են այն ծավալները, մասշտաբները, որոնք առկա են. «Այո՛, աննախադեպ հաջողություններ ունենք: Մասնավորապես, այս տարի Հատուկ քննչական ծառայությունը վերականգնել է 7 անգամ ավելի շատ գումար, քան Հատուկ քննչական ծառայության գոյության ողջ ընթացքում, իսկ այն գոյություն ունի արդեն 11 տարի: Սա ցուցանիշ է, որը չի կարելի չընդունել, չգնահատել, բայց մյուս կողմից մեր սահմանած նշաձողերն շատ ավելի բարձր են, եւ մենք մեր հակակոռուպցիոն համակարգերի բարելավման, օրենսդրության կատարելագործման միջոցով պետք է այս միջոցը դարձնենք ավելի արդյունավետ, որովհետեւ մենք բոլորս գիտենք, որ դրա պոտենցիալը կա»,-ասաց Նիկոլ Փաշինյանը:
