Քրեական օրենսգրքի փոփոխությունները կարող են էապես սահմանափակել լրատվամիջոցների գործունեությունը: Այս մասին փետրվարի 21-ին լրագրողների հետ հանդիպման ժամանակ հայտարարեց Հանրային պաշտպանի գրասենյակի ղեկավարի տեղակալ Արմինե Ֆանյանը:
Նա պարզաբանեց, որ առաջարկվում է ընդլայնել հանցագործությունների շրջանակը ենթադրաբար կատարված հանցագործության մասին կանխահայտորեն կեղծ ցուցմունքներ տալու մասով: «Նոր օրենքով լրատվամիջոցները կարող են քրեական հետապնդման սպառնալիքի բախվել, եթե հրաժարվեն աղբյուրը բացահայտելուց, որը հիմք է հանդիսացել ենթադրյալ հանցագործության վերաբերյալ նյութեր հրապարակելու համար:
Եթե լրատվամիջոցները չբացահայտեն իրենց աղբյուրը, ապա իրավապահ մարմինները կարող են դա որպես հանցագործության մասին կեղծ տեղեկությունների հրապարակում որակել եւ պատասխանատվության ենթարկել լրատվամիջոցներին: Այսպիս նորմը կարող է գործիք դառնալ ցանկացած պետության ձեռքում, որը կցանկանա սահմանափակել լրատվամիջոցների գործունեությունը: Այս օրենքի երկակի մեկնաբանությունից խուսափելու համար հարկավոր է կամ ջնջել այդ հատվածը, կամ խմբագրել այն եւ հստակ նշել, թե որ սուբյեկտը կարող է քրեական պատասխանատվություն կրել` հանցագործության մասին կեղծ տեղեկություններ տարածելու համար: Դա կապահովի ԶԼՄ-ների պաշտպանությունն ու անկախությունը»,- ասաց Արմինե Ֆանյանը:
Հայաստանի փաստաբանների պալատի փոխնախագահ Արութ Աքլունցն էլ իր հերթին ավելացրեց, որ, մասնավորապես, խոցելի վիճակում կհայտնվեն տպագիր ԶԼՄ-ները, քանի որ տպագիր նյութը հրապարակելիս ավելի դժվար է բացահայտել տեղեկատվության աղբյուրը, քան, օրինակ, եթե դա տեսանյութ է: «Սակայն, նույնիսկ տեսանյութում քաղաքացին կարող է լրագրողին հայտնել ենթադրյալ հանցագործության մասին, եւ այդ դեպքում հարց է ծագում. կարո՞ղ են լրատվամիջոցները ինչ-ինչ պատճառներով հետապնդվել, եթե այդ տեղեկատվությունը կեղծ լինի: Առաջարկվող փոփոխությունները կօգնեն պարզություն մտցնել նման իրավիճակներում»,- պարզաբանեց նա:
