Ծիծաղելի է, երբ պետգնումների մրցույթներում հաղթանակ են շնորհում այն ընկերությանը, որն իր ծառայությունների կամ արտադրանքի համար առաջարկում է առավել ցածր գին: Այս մասին փետրվարի 21-ին ԱԺ-ում «Պետական գնումների համակարգի խնդիրները եւ դրանց լուծման ուղիները» թեմայով խորհրդարանական լսումների ժամանակ ասաց «Բարգավաճ Հայաստան» կուսակցության պատգամավոր Սերգեյ Բագրատյանը:
Խորհրդարանականի կարծիքով՝ նման մոտեցումն անհրաժեշտ է վերանայել:
«Եթե մրցույթի ժամանակ մի ընկերությունն իր արտադրանքի համար առաջարկել է վճարել 1 դոլար, իսկ մյուսը՝ 10 դոլար, ապա ստացվում է, որ միջին գինը կազմում է 5 դոլար: Հաղթանակը պետք է շնորհել այն ընկերությանը, որն առաջարկել է միջինին մոտ գին»,- շեշտեց պատգամավորը:
Բագրատյանը նաեւ անդրադարձավ Եվրասիական տնտեսական միության շրջանակում անցկացվող մրցույթներին Հայաստանի մասնակցության հնարավորությանը: Խորհրդարանականի կարծիքով՝ Հայաստանն, ասես, այս մրցույթներից մեկուսացված է: Նա սա պայմանավորում է այն հանգամանքով, որ հայկական ընկերություններն իրենց անպաշտպան են զգում եւ չեն ցանկանում դիմել չարդարացված ռիսկերի:
