News
Լրահոս
News
Հինգշաբթի
Մարտ 28
Տեսնել լրահոսը

Հանրաքվեի քարոզարշավն արդեն մեկնարկել է. այս պահին ոչ թե հանրային քարոզարշավ ենք իրականացնում, այլ մարզերում եւ Երեւանի համայնքներում նախապատրաստական եւ հանդիպումների տեսքով աշխատանքներ են իրականացվում: Այս մասին այսօր՝ փետրվարի 21-ին, ԱԺ-ում լրագրողների հետ զրույցում նշեց ԱԺ «Իմ քայլը» խմբակցության ղեկավար Լիլիթ Մակունցը՝ հավելելով, որ օրերս «Այո»-ի շտաբի պետը հանդես կգա ասուլիսով եւ կներկայացնի հանգամանալիք, թե ինչ են պատրաստվում անել:

Անդրադառնալով փաստին, որ «Ոչ»-ի կողմը քարոզարշավ չի իրականացնելու որպես այդպիսին, Մակունցը նկատեց, որ ցանկացած ու ինքն է ընտրում՝ մասնակցել գործընթացին, թե ոչ. «Այստեղ ինձ համար անձամբ հարցն այլ դաշտումէ  գտնվում, որ քաղաքական հայտ ներկայացնող ուժերը որեւէ դիրքորոշում չեն հայտնում համապետական քաղաքական իրադարձությանը: Երկրորդ, թեեւ պաշտոնապես հայտարարվել է, որ «Ոչ»-ի քարոզ չի իրականացվում, այնուամենայնիվ, այն քաղաքական ուժերը, որոնք բոյկոտի կոչ են անում, դրանով արդեն իսկ անթաքույց իրականացնում են «ոչ.-ի քարոզ: Այդ պարագայում ինձ համար անհասկանալի է, թե ինչու քաղաքական պատասխանատվություն չեն ստանձնում եւ չի իրականացվում քարոզրարշավ»,-ասաց Մակունցը:

Հարցին, թե չի՞ ստացվում, որ քաղաքական մեծամասնությունն իր քաղաքական նախաձեռնությունում մնացել է մենակ, եւ որ դա ի սկզբանե ստվերում է հանրաքվեի ողջ գործընթացը, «Իմ քայլի» ղեկավարն ասաց. «Գործընթացն իրավական ու սահմանադրական է: Հանրաքվեն վերաբերում է Սահմանադրության ընդամենը մեկ հոդվածի, որը հնարավորություն է տալիս վերականգնելու ՍԴ այն մոդելը, որը հաստատվել է 2015-ի Սահմանադրական փոփոխություններով, որը դրական եզրակացության է արժանացել միջազգային կառույցների կողմից, ում ուղարկվել է եզրակացության: Հետեւաբար, այստեղ մենակ մնալ-չմնալու հարց չկա, այստեղ նոր Սահմանադրությունն ամբողջությամբ գործարկելու մասին է»:

Դիտարկմանը, որ վարչապետ Նիկոլ Փաշինյանը նախօրեին իր հարցազրույցում թերահավատորեն է վերաբերվել Վենետիկի հանձնաժողովին, սակայն ՍԴ դատավորներին վաղ կենսաթոշակի ուղարկելու վերաբերյալ նախագիծն այնուամենայնիվ ուղարկվել է Վենետիկի հանձնաժողով եզրակացության, ինչու մի դեպքում շրջանցել են ԲՎենետիկի հանձնաժողովը, մյուս դեպքում՝ ոչ, Մակունցն արձագանքեց. «2015-ին Սահմանադրության նախագիծը, այդ թվում ՍԴ այն մոդելով, որն այս պահին չի գործում, ուղարկվել է բոլոր միջազգային կառույցներին, այդ թվում Վենետիկի հանձնաժողովին եւ ստացվել են դրական եզրակացություններ: Մենք հիմա առաջարկում ենք վերականգնել այն մոդելը, որն արդեն 2015-ի Սահմանադրությամբ հաստատվել է: Չի գործում այն ՍԴ-ն, որի մոդելը հաստատել են միջազգային կառույցները: Այսինքն մենք ընդամենը վերահաստատում ենք Վենետիկի կողմից հավանության արժանացած փաթեթը»:

Մակունցը հավելեց, որ այս պահին դեռ վերջնական որոշում չունեն վենետիկի հանձնաժողով ուղարկելու վերաբերյալ, բայց դեռ ժամանակ ունեն որոշում կայացնելու համար:

Հարցին, թե Վենետիկի հանձնաժողովին չվստահելու առիթ ունի՞ իշխանությունը, նա պատասխանեց. «Մենք բավականին լավ, սերտ հարաբերություններ ունենք մեր միջազգային գործընկերների հետ: Միաժամանակ կան անհանգստացնող որոշակի հանգամանքներ, որոնք պետք է վերջնական լուծում ստանան մինչեւ քայլ անելը կամ գնահատական հնչեցնելը»:

!
Այս նյութը հասանելի է նաև   English and Русский
Տպել
Ամենաշատ