Փետրվարի 23-ին Մայր Աթոռ Սուրբ Էջմիածնում Ն.Ս.Օ.Տ.Տ. Գարեգին Երկրորդ Ծայրագույն Պատրիարք եւ Ամենայն Հայոց Կաթողիկոսը հյուրընկալեց ՁԻԱՀ-ի կանխարգելման հանրապետական կենտրոնի աշխատակիցներին եւ նրանց ընտանիքներին:
ՁԻԱՀ-ի կանխարգելման հանրապետական կենտրոնի տնօրեն Սամվել Գրիգորյանն Ամենայն Հայոց Կաթողիկոսին ներկայացրեց կենտրոնի գործունեության պատմությունը, միջազգային բժշկության ոլորտում արձանագրած ձեռքբերումները, պարգեւատրումները՝ հատկապես հատկանշական համարելով այն հանգամանքը, որ ամբողջ աշխարհում Հայաստանը ճանաչվել է բացառիկ երկրներից մեկը, որտեղ հաղթահարված է ՄԻԱՎ վարակի փոխանցումը մայրիկից զավակին:
Տիար Ս․ Գրիգորյանը շնորհակալություն հայտնեց Վեհափառ Հայրապետին, որ կենտրոնի գոյության երեսուն տարիների ընթացքում Հայաստանյայց Առաքելական Սուրբ Եկեղեցին ակտիվ գործակցում է ՁԻԱՀ կանխարգելման հանրապետական կենտրոնի հետ:
Այնուհետեւ Ամենայն Հայոց Կաթողիկոսն իր գնահատանքը փոխանցեց կենտրոնի բժիշկներին՝ ընդգծելով, որ վերջիններս կարեւոր առաքելություն են իրականացնում ՁԻԱՀ կանխարգելման ոլորտում: Գարեգին Երկրորդ Հայրապետը գոհունակությամբ փաստեց, որ կենտրոնի բժիշկները մեծ ջանքեր են գործադրում ՁԻԱՀ-ով տառապող մարդկանց կյանքի նկատմամբ վերստին հավատք, վստահություն եւ սեր ներշնչելու համար: Նորին Սրբությունը ողջունեց նաեւ կենտրոնի տնօրենի եւ աշխատակիցների սերտ կապը Մայր Աթոռ Սուրբ Էջմիածնի հետ եւ նրանց հավատարմությունը քրիստոնեական արժեքներին:
Զրույցի ընթացքում Ամենայն Հայոց Կաթողիկոսը պատասխանեց ներկաների հարցերին։
Վերջում Ամենայն Հայոց Կաթողիկոսը մաղթեց, որ Աստծու օգնականությունն ու օրհնությունը մշտապես ուղեկից լինի բժիշկներին` իրենց պատասխանատու առաքելության մեջ:
