Ֆրանսիան կսատարի Հունաստանին եւ Կիպրոսին Միջերկրական ծովում ջրային գոտիների հարցով Թուրքիայի հետ նրանց վեճում, հայտարարել է Ֆրանսիայի պաշտպանության նախարար Ֆլորենս Պարլին։
«Ֆրանսիան մտադիր է սատարել Հունաստանին եւ օգնել նրան դիմակայել Էգեյան ծովում եւ Միջերկրական ծովի արեւելքում»,- հունական Vima թերթին տված հարցազրույցում ասել է Պարլին։
Նրա խոսքերով՝ նախագահ Էմանուել Մակրոնը հունվարի վերջին Հունաստանի վարչապետ Կիրիակոս Միցոտակիսի հետ հանդիպման ժամանակ պարզ հասկացրել է, որ Փարիզը եւ Աթենքը մտադիր են ամրապնդել պաշտպանության ոլորտում համագործակցությունը։
«Ֆրանսիան սատարում է Հունաստանին եւ Կիպրոսին ծովային գոտիներում նրանց ինքնիշխանությունը հարգելու հարցում եւ իր եվրոպական դաշնակիցների հետ միասին դատապարտում է Թուրքիայի կողմից այդ հիմնարար կանոնների խախտումը»,- հայտարարել է Պարլին։
Աթենքը վրդովված էր նոյեմբերի 27-ին Լիբիայի եւ Թուրքիայի կողմից ստորագրված համաձայնագրից, որով երկու երկրների միջեւ ծովային սահմանն անցնում է հունական Կրետե կղզու մոտով՝ անվանելով այն միջազգային իրավունքի աղաղակող խախտում։
Հունաստանը համաձայնագիրն անվանել է «աբսուրդ», քանի որ այն անտեսում է Կրետեի ներկայությունը Թուրքիայի եւ Լիբիայի ափերի միջեւ։
Պարլին ասել է, թե այդ համաձայնագիրը լուրջ մտահոգություն է առաջացնում։
«Այդ համաձայնագիրը սպառնալիքի տակ է դնում տարածաշրջանի շահերն ու անվտանգությունը։ Այն չունի որեւէ իրավական ուժ եւ չի համապատասխանում միջազգային իրավունքին»,- ասել է նա։