ԵՄ-ի եւ Հայաստանի միջեւ հարաբերությունների դրական զարգացումը հաստատվում է երկկողմ ձեւաչափով տրամադրվող օգնության ծավալի ավելացումով: Այս մասին փետրվարի 26- Ազգային ժողովում Եվրոպական ինտեգրման հարցերով մշտական խորհրդարանական հանձնաժողովի կողմից նախաձեռնած Հայաստանի եւ ԵՄ-ի միջեւ Համապարփակ եւ ընդլայնված գործընկերության համաձայնագրի կատարման ընթացքի վերաբերյալ լսումների ժամանակ հայտարարեց Հայաստան-ԵՄ համաձայնագրի կատարման համակարգման միջգերատեսչական հանձնաժողովի նախագահ, ՀՀ փոխվարչապետ Մհեր Գրիգորյանը:
Նա, մասնավորապես, նշեց, որ 2019 թվականին գործողությունների ծրագրով նախատեսված օգնության ծավալը նախորդ տարիների համեմատ ավելացել է եւ կազմել է 65 միլիոն եվրո:
Գրիգորյանը հույս հայտնեց, որ այս տարի աջակցության ծավալը կավելանա: «2020 թվականի համար աջակցության ոլորտներն արդեն նախատեսվել եւ հստակեցվել են: Հուսով եմ, որ աջակցության ծավալն ավելին կլինի, քան 2019-ին էր»,- ասաց Գրիգորյանը:
Նա նշեց, որ 2020 թվականի ծրագրի շրջանակներում աջակցություն է նախատեսված արդարադատության ոլորտի եւ ոստիկանության ռազմավարական բարեփոխումների համար, որոնք ներառված են առաջնահերթությունների ցանկում: