Ցավոք, այս պահին Արարատի մարզում մենք գեթ մեկ հյուրանոցային համալիր չունենք, որ ես կարողանամ նշել, եւ սովորաբար, զբոսաշրջիկները մեր մարզում չեն գիշերում: Այս մասին այսօր՝ փետրվարի 26-ին, լրագրողների հետ հանդիպման ժամանակ նշեց Արարատի մարզպետ Գարիկ Սարգսյանը՝ ներկայացնելով 2019-ին կատարված աշխատանքն ու հետագա ծրագրերը:
«Քանի որ մենք Երեւանին շատ մոտ ենք գտնվում, նրանք հանգրվանում են Երեւանի հյուրանոցներում եւ կարելի է ասել, մեր մարզով տրանզիտ անցնում են: Կանառ են կատարում միայն Խոր Վիրապում, հետո նաեւ Նորավանքում:
Բայց մեր մարզում կա Դվինի հնավայրը, Արտաշատ մայրաքաղաքը, Խոր Վիրապը, Սուրբ Կարապետը, Կոռիշխանի բերդը եւ այլն»,-ասաց մարզպետը:
Նա տեղեկացրեց, որ այս պահին մտածում են Ծիրանի փառատոն կազմակերպել մեծ շուքով. «Ինչպես գիտեք ամենաշուտը մեզ մոտ է ծիրանը հասունանում: Նաեւ աշնանը նախատեսում ենք բերքի տոնը նշել մեծ շուքով»:
Գարիկ Սարգսյանն անդրադարձավ նաեւ սպանդանոցների խնդրին՝ նշելով. «Արարատի մարզում կան սպանդանոցների բիզնեսում ռեալ ներդրումներ կատարողներ: Մենք նրանց հետ քարտեզագրել ենք, թե որտեղ է ավելի ճիշտ կառուցել սպանդանոցները, որ հավասարաչափհեռավորության վրա գտնվեն իրարից եւ հասանելի լինեն: Կլինեն նաեւ շարժական սպանդանոցներ: 17 տեղ ենք նշել մեր քարտեզի վրա եւ առաջարկել ենք այդ քարտեզը ներդրողներին: Մինչեւ հուլիսի 1-ը այդ խնդիրը պետք է լուծված լինի»: