News
Լրահոս
News
Կիրակի
Մարտ 29
USD
498.43
EUR
548.22
RUB
6.4
ME-USD
0.03
Տեսնել լրահոսը

Վրաստանի առողջապահության նախարարությունը եւ այլ պետական գերատեսչություններ լիովին վերահսկում են  կորոնավիրուսի հետ կապված իրավիճակը եւ խուճապի առիթ չկա: Այս մասին այսօր կառավարության նիստին հայտարարել է Վրաստանի վարչապետ Գեորգի Գախարիան, փոխանցում է «Նովոստի-Գրուզիա»-ն:

Փետրվարի 26-ին Վրաստանում գրանցվել էր կորոնավիրուսով վարակման առաջին դեպքը: Պացիենտը Վրաստանի 50-ամյա քաղաքացի է, ով Ադրբեջանի տարածքով ժամանել էր Իրանից: «Կարմիր կամուրջ» անցակետում (վրաց-ադրբեջանական սահման) տղամարդու մոտ ջերմություն էր գրանցվել, ինչից հետո նրան տեղափոխել էին Թբիլիսիի Կենտրոնական ինֆեկցիոն հիվանդանոց: Ավելի ուշ, Ռիչարդ Լուգարի հանրային առողջապահության հետազոտական կենտրոնում արված նոր կորոնավիրուսի թեստը դրական արդյունք էր ցույց տվել:

Վրաստանի վարչապետն ընդգծել է, որ «առաջին դեպքը  հենց սահմանին հայտնաբերել» հնարավոր եղավ փետրվարի 28-ին իր կարգադրությամբ ստեղծված համակարգող խորհրդի ակտիվ աշխատանքի շնորհիվ:

«Նա գրեթե ոչ մի շփում չի ունեցել մեր քաղաքացիների հետ: Սա առաջին դեպքն էր, որը գրանցվել էր հենց սահմանին, ինչի համար ուզում եմ շնորհակալություն հայտնել ինչպես առողջապահության նախարարության աշխատակիցներին, այնպես էլ մաքսային ծառայողներին, սահմանային ծառայության աշխակիցներին»,- ասել է Գախարիան:

Վարակված քաղաքացու հետ շփմված մաքսային ծառայողները կարանտինում են: Տղամարդու ուղեկիցը զննման նպատակով շարունակում է մնալ Թբիլիսիի ինֆեկցիոն հիվանդանոցում: Լաբորատոր ուսումնասիրությունները նրա մոտ կորոնավիրուս չեն հայտնաբերել: Մի քանի մարդ, որոնք երթուղային միկրոավտոբուսով վարակված վրացու հետ միասին ուղեւորվում էին դեպի սահման, տեղափոխվել են կարանտին Ադրբեջանում:

Կառավարության նիստի ժամանակ Գախարիան հայտարարել է, որ համակարգող խորհուրդը շարունակում է ակտիվ ռեժիմում աշխատել: Նա միաժամանակ Վրաստանի բնակչությանը կոչ է արել հետեւել Առողջապահության համաշխարհային կազմակեևրպության բոլոր հանձնարարականներին:

Երկրում նոր կորոնավիրուսով վարակման առաջին դեպքի հայտնաբերման հետ կապված՝ Վրաստանի կառավարությունը փետրվարի 26-ին որոշում է ընդունել 2 շաբաթով Իրանի հետ օդային եւ ցամաքային հաղորդակցության սահմանափակումներ մտցնելու մասին:

Դրանից բացի, նոր տեսակի թոքաբորբի բռնկման պատճառով Վրաստանն ավելի վաղ ժամանակավորապես կասեցրել էր Չինաստանի հետ ավիահաղորդակցությունը: Արգելված է նաեւ Չինաստանից կենդանիների ներմուծումը: Օդանավակայաններում եւ Վրաստանի պետական սահմանի անցակետերում մասնագետները ստուգում են բոլոր ճանապարհորդներին: Առողջապահության նախարարությունը բնակչության շրջանում անցկացնում է ակտիվ տեղեկատվական արշավ:

Նոր կորոնավիրուսի (2019-nCoV) առաջացրած հիվանդությունը բռնկվել է Կենտրոնական Չինաստանի ամենախիտ բնակեցված՝ 12 մլն բնակչությամբ Ուհան քաղաքում: Առողջապահության համաշխարհային կազմակերպությունը այն ճանաչել է միջազգային մասշտաբի արտակարգ իրավիճակ՝ բնորոշելով որպես բազմաթիվ օջախներով համաճարակ: Չինաստանի սահմաններից դուրս  վարակման դեպքեր են հայտնաբերվել 42 երկրներում, այդ թվում՝ Ռուսաստանում: Չինաստանի իշխանությունները երկրում գրանցել են մահվան 2744 դեպք, առողջացել է ավելի քան 32,4 հազար մարդ, վիրուսի տարածման ամբողջ ընթացքում վարակվածների թիվն անցել է 78,4 հազարից:

 

!
Այս նյութը հասանելի է նաև   Русский
Տպել
Ամենաշատ