Ռենջեր Նիկոլ Դանգուրը, որն աշխատում է Զամբիայի «Հարավային Լուանգվա» ազգային այգում, պատմել է այնտեղ ապրող կենդանիների կյանքից իր զարմանալի դիտարկումների մասին։ Երկոյան զբոսաշրջիկներին այգում ուղեկցելիս նա նկատել է կոկորդիլոսների զույգին, որը ինչ-որ կենդանի էր որսացել եւ վայելում էր այն։ Սակայն տեսարանն ավելի հետաքրքիր է դարձել, երբ թարմ մսի հոտի վրա եկել է հովազը եւ առանց որեւէ դժվարության խլել սողուններից որսի մի մասը, հայտնում է Nat-geo-ն։
Կոկորդիլոսներն ունեն հզոր սուր ատամներ, սակայն դրանք նախատեսված են միայն որսալու եւ կծելու համար՝ ծամել սողունը չի կարող։ Խոշոր կենդանի ուտելիս կոկորդիլոսը նրան պարզապես այնպիսի մասերի է բաժանում, որ կարողանա կուլ տալ։ Դրանից էլ օգտվել է հովազը։
Հովազները հմուտ որսորդներ են, սակայն նրանք դիեր էլ են ուտում, իսկ այլ գիշատչի կողմից հենց նոր բռնված կենդանին իդեալական ուտելիք է՝ այն դեռ թարմ է եւ պետք չէ ծախսել սեփական ջանքերը։ Զբոսաշրջիկների աչքի առջեւ հովազը նախ սկսել է կծոտել կոկորդիլոսի երախից դուրս եկած մսի կտորները, այնուհետեւ հանել հսկայական կտոր, հավանաբար իմպալայի ոտք, ու մտել թփերի մեջ։
