Պետական վերահսկողական ծառայության պետ (լիազորությունները ժամանակավորապես կասեցված են) Դավիթ Սանասարյանը շարունակում է պնդել, որ ինքը երեխային չի հարվածել, երեխան է դիպել իր մեքենային եւ ընկել, որի արդյունքում, կասկածելի պայմաններում ստացել է վնասվածք։ Այս մասին այսօր՝ փետրվարի 27-ին, լրագրողների հետ զրույցում ասաց Սանասարյանը։
«Փորձաքննության արդյունքում պարզվել էր, որ ես չէի կարող կանխարգելել այդ վթարը։ Փորձագետը ելակետային տվյալներն օգտագործելով՝ եկել էր այն եզրահանգման, որ ես չէի կարող կանխարգելեի այդ վթարը։ Պաշտպանական կողմը մանիպուլատիվ բան էր գտել, որ փորձագետը պնդել է՝ վրաերթ է տեղի ունեցել, ես շարունակում եմ պնդել, որ ես երեխային չեմ հարվածել իմ մեքենայով, երեխան է դիպչել իմ մեքենային եւ ընկել, որի արդյունքում, կասկածելի պայմաններում ստացել է վնասվածք, առաջին, երկրորդ ռենտգենը ցույց չէր տվել վնասվածք, 1 ամիս անց փորձաքննությունը վնասվածք էր արձանագրել»։
Հիշեցնենք, որ Սանասարյանի մասնակցությամբ վրաերթը տեղի էր ունեցել սեպտեմբերի 12–ին Կիեւյան 4 հասցեում գտնվող բակերից մեկում։ Մամուլի հրապարակումների համաձայն՝ մայրը երեխային տեղափոխել էր «Արմենիա» հանրապետական բժշկական կենտրոն, ուր այցելել էր նաեւ Դավիթ Սանասարյանը եւ տեղում պայմանավորվածություն ձեռք բերել բժիշկների հետ, որպեսզի դեպքի մասին չհայտնեն ոստիկանությանը, այսինքն՝ չգրանցվի որպես վրաերթ, այլ որպես բակում խաղալու ընթացքում ստացած վնասվածք:
Դավիթ Սանասարյանը նախ հերքել էր իր մասնակցությունը վրաերթին՝ այն անվանելով «հերթական շառը», սակայն այն բանից հետո, երբ Analitik.am-ը հրապարակեց տեսանյութ, որտեղ 9-ամյա երեխան եւ նրա մայրը մանրամասներ էին հայտնում դեպքի մասին, Սանասարյանն ըստ էության չթաքցրեց, որ կապ է ունեցել կատարվածի հետ։
Ըստ Սանասարյանի՝ երեխան մեքենայի կողքից՝ քարի վրայից թռչելուց դիպչել է իր մեքենային եւ ընկել գետնին։ Նա նաեւ նշել է, որ մարդասիրությունից դրդված հետաքրքրվել է երեխայի առողջությունով, նրանց հետ երկու անգամ գնացել ԲԿ:
