Թուրքիայի գլխավոր շտաբի ղեկավար Յաշար Գյուլերը հեռախոսազրույց է ունեցել ԱՄՆ ԶՈւ շտաբերի պետերի միացյալ կոմիտեի ղեկավար Մարկ Միլլիի հետ, որի ժամանակ կողմերը քննարկել են Սիրիայի իրավիճակը այն բանից հետո, երբ Իդլիբում թուրք զինվորականներ են մահացել, հաղորդում է Anadolu-ն:
Զրույցի մանրամասները չեն հաղորդվում:
Ավելի վաղ ՌԴ ՊՆ-ն հայտնել է, որ Միլիի հետ հեռախոսազրույց է ունեցել ՌԴ ԶՈւ ԳՇ պետ Վալերի Գերասիմովը, կողմերը քննարկել են Սիրիայի իրավիճակը եւ փոխադարձ հետաքրքրություն ներկայացնող այլ հարցեր:
Իդլիբում իրավիճակը սրվել է այն բանից հետո, երբ փետրվարի 27-ին «Հայաթ Թահրիր աշ-Շամի» ահաբեկիչները խոշորամասշտաբ հարձակում են սկսել Սիրիայի կառավարական զորքերի դիրքերի վրա: Սիրիայի բանակը պատասխան կրակ է բացել: ՌԴ ՊՆ-ի տեղեկություններով՝ գնդակոծման են ենթարկվել այդ թվում թուրք զինվորականները, որոնք չպետք է այնտեղ գտնվեին:
