Վաշինգտոնն առանց տատանվելու չեղյալ կհայտարարի «Թալիբանի» հետ համաձայնագիրը, եթե նա չկատարի իր վրա վերցրած պարտավորությունները։ Այս մասին Պենտագոնի ղեկավար Մարկ Էսպերը հայտարարել է Քաբուլում մամուլի ասուլիսի ժամանակ, հայտնում է ՏԱՍՍ-ը։
«Մենք կոչ ենք անում «Թալիբանին» հավատարիմ մնալ իրենց պարտավորություններին, ինչպես գրված է ԱՄՆ-ի հետ համաձայնագրում՝ այդ թվում աջակցելով երկրում բռնության մակարդակի նվազմանը։ Եթե «Թալիբանը» չկատարի իր պարտավորությունները, նրանք կզրկվեն աֆղանցիների հետ բանակցությունների սեղանի շուրջ նստելու եւ իրենց երկրի ապագան քննարկելու հնարավորությունից։ Ավելին, ԱՄՆ-ը առանց տատանվելու չեղյալ կհայտարարի համաձայնագիրը»,- նշել է նախարարը, որի խոսքերն է մեջբերում ԱՄՆ ՊՆ մամուլի ծառայությունը։
Էսպերն ընդգծել է, որ ԱՄՆ-ը «ուշադիր կհետեւի թալիբների գործողություններին»։ «Եթե թալիբները կատարեն պայմանավորվածությունները, ԱՄՆ-ը, պայմանների համաձայն, կսկսի կրճատել իր ռազմական ներկայությունը Աֆղանստանում։ Դրա հետ մեկտեղ, մենք զորքերի համաչափ կրճատման ուղղությամբ կաշխատենք կոալիցիայի այլ անդամների հետ»,- հավելել է Պենտագոնի ղեկավարը։
