Sputnik Թուրքիա կայքը մանրամասներ է հայտնել Անկարայում իր աշխատակիցների վրա հարձակման փորձի մասին:
Ավելի վաղ RT հեռուստաալիքի գլխավոր խմբագիր Մարգարիտա Սիմոնյանը հայտնել է, որ անհայտ անձինք ներխուժել են Անկարայում երեք աշխատակիցների տուն եւ մեղադրել նրանց Հայրենիքը դավաճանելու մեջ, հաղորդում է ՌԻԱ Նովոստի-ն:
«Փետրվարի 29-ին՝ Մոսկվայի ժամանակով 22.30-23.00-ի շրջանում, մեր երեք աշխատակիցների բնակարան են փորձել ներխուժել մարդկանց խմբեր, որոնք վանկարկել են ազգայնական կարգախոսեր, վիրավորանքներ եւ սպառնալիքներ: Հարձակվողները փորձել են կոտրել դռները: Մեր աշխատակիցների խոսքով, որոնք դիմել են ոստիկանություն եւ այժմ ցուցմունք են տալիս, այդ խմբերից յուրաքանչյուրում եղել է առնվազն 10 մարդ»,-հաղորդվում է Sputnik Թուրքիա կայքում:
Նշվում է, որ հարձակվողները վանկարկել են «Թուրքիան թուրքերի համար», «Դավաճաններ», «Ռուս լրտեսներ», «Նահատակներն անմահ են, Հայրենիքն՝ անքակտելի» եւ այլ կարգախոսեր:
«Հարձակվողները փախուստի են դիմել ոստիկանության ժամանումից առաջ, իսկ հարձակման հետեւանքով տուժածներ չկան»,-ասվում է հաղորդագրության մեջ: