Իրանից չկա այն ծավալի ներկրվող ապրանք, որ սահմանափակումները կարող են մեր շուկայում դեֆիցիտ կամ խոչնդոտ առաջացնել: Այս մասին այսօր՝ մարտի 2-ին լրագրողների հետ հանդիպման ժամանակ նշեց Տնտեսական մրցակցության պաշտպանության պետական հանձնաժողովի նախագահ Գեղամ Գեւորգյանը:
«Նույնիսկ դիզելի պարագայում դրա ծավալն այնքան շատ չէ որ մենք խնդիր ունենանք, չհաշված, որ էդ ապրանքները պահեստավորված են եւ երկար ժամանակի համար օգտագործվում են»,-ասաց նա՝ հավելելով, որ այս սահմանափակումները երկար ժամանակով չեն:
«Դեֆիցիտը մի կողմից վախեցնում է խոշոր տնտեսվարողներին, որոնք այս պահին դրսեւորում են բավական լավ վարքագիծ, մյուս կողմից ավելորդ ու անտեղի խուճապ է առաջացնում քաղաքացիների մոտ:
Դիմակի պահանջարկը մի քիչ ուռճացված է, դիմակների այդքան անհրաժեշտություն չկա, բայց չգիտես ինչու բոլորն ուզում են դիմակ կրել: Առողջապահության նախարարությունն էլ հորդորում է, որ ըստ անհրաժեշտության օգտագործեն դիմակները»,-ասաց նա:
