Եթե ընտրվեմ Արցախի նախագահ ՀՀ վարչապետի հետ աշխատելու եմ պարզ օրենքներով եւ 2 երկրների Սահմանադրությամբ։ Այս մասին իր ելույթում հայտարարել է Արցախի Հանրապետության նախագահի թեկնածու, Արցախի հերոս Վիտալի Բալասանյանը։
Նշենք, որ նա նախընտրական քարոզարշավի շրջանակներում այցելել է Քաշաթաղի շրջանի Կովսական եւ Փակահան համայնքներ: Ընտրողների հետ հանդիպմանը նախագահի թեկնածուն ներկայացրել է իր նախընտրական ծրագրի հինադրույթները:
«Քարվաճառը, Քաշաթաղը ռազմավարական մեծ նշանակություն ունեն, եւ շեշտը պետք է դրվի նաեւ այդ համայնքների զարգացմանը։ Գյուղատնտեսությամբ զբաղվողների համար բազմաթիվ չլուծված հարցեր կան: Արոտավայրերի հարցն է, վարելահողերի հարցը, ճանապարհների հարցը: Այնպիսի տպավորություն է, որ մենք արհամարհված ենք: Մենք չենք ուզում արհամարհված լինել ոչ մեկի կողմից։ Ցանկությունս է, որ այս տարածքներին տանք ռազմավարական նշանակություն։ Այս տարածքները պետք է լինեն պետության հովանու ներքո։ Յուրաքանչյուր այստեղ ապրող քաղաքացի իր տեղը, դերն ու նշանակությունը պետք է զգա։ Չպետք է քաղաքացիները քաղաքական սխալ թույլ տան, թե՛ Արցախի եւ թե՛ Հայաստանի համար։ Եկեք ճիշտ որոշում կայացնենք, եւ չլսենք որեւէ մեկին։ Նրանք, որոնք ժամանակ առ ժամանակ հայտնվում են ընտրությունների նախօրեին, ասում՝ մեկին սա կտանք, մյուսին՝ սա. հասկանանք, սոցիալական լուրջ խնդիրներ ունեն մեր ընտանիքները։ Յուրաքանչոյւրի ձայնը իր սեփականությունն է, այն չի վաճառվում։ Մեր կարգախոսն է՝ հաղթանակը չի վաճառվում»։
Բալասանյանը ընդգծել է, որ թիմին ծանոթ են համայնքային խնդիրները, եւ իր նախընտրական ծրագիրը տալիս է բոլոր խնդիրների լուծումը:
«Եթե ընտրվեմ Արցախի Հանրապետության նախագահ Հայաստանի Հանրապետության վարչապետի հետ աշխատելու եմ շատ պարզ օրենքներով եւ 2 երկրների Սահմանադրությամբ։ Կցանկանայի, որ Արցախում ապրողներն անխտիր մասնակցեն ընտրություններին, եւ ապրիլի 1-ին բոլորը լինեն համախմբված, մեր մեջ տարանջատված կամ դժգոհ մարդ չլինի։
Նախագահի թեկնածուն նշել է, որ Իրանին եւ Ադրբեջանին սահմանակից գյուղերին պետք է տրվի ռազմավարական շրջանի կարգավիճակ, եւ դրանցում բնակվողները լինեն պետության հոգածության ներքո:
Վիտալի Բալասանյանը պատասխանել է նաեւ բնակիչներին հուզող հարցերին, որոնք տարաբնույթ էին՝ սոցիալական խնդիրներ, ճանապարհների վիճակ, բուժկետի բացակայություն, մանկաբույժի բացակայություն եւ այլն։
Քաղաքացիներից մեկը նշեց, որ չունի աշխատանք. «10 հոգանոց ընտանիք ունեմ, բայց աշխատանք չունեմ։ Մանկաբույժ չունեմ, ես ի՞նչ անեմ։ Գնում եմ Կապան, ինձ ասում են՝ գնա քո տարածք, մի արի այստեղ։ Հիմա ես ինչպե՞ս հասնեմ Ստեփանակերտ։ Կովսականն իրոք մենակ է, մենք մերոնցով ենք ու վերջ, ոչ մեկ ղեկավարությունից…։ Եթե շտապ օգնությունը գա, հաստատ բոլորն իրենց լավ կզգան, հասկանալով, որ անտեսված չեն։ Ես դեռ չեմ էլ խոսում աշխատանքի, դաշտերի մասին»։
Վիտալի Բալասանյանը համարում է հանրության հետ երկխոսությունը կայացած. «Դա խնդիրների լուծման կարեւոր գրավականն է»։