Ալբանիան եւ Հյուսիսային Մակեդոնիան գործադրել են բավականաչափ ջանքեր, որպեսզի վաստակեն Եվրամիության կազմում ներառվելու շուրջ բանակցությունների մեկնարկը, հայտարարել է Եվրահանձնաժողովը, հաղորդում է Reuters-ը:
Ֆրանսիայի նախագահ Էմանուել Մակրոնը, որն արգելափակել էր Սկոպյեյի եւ Տիրանայի հետ բանակցությունները հոկտեմբերին, հայտարարել է փետրվարին, որ պատրաստ է թույլ տալ նրանց սկսել անդամության շուրջ բանակցությունները, եթե Եվրահանձնաժողովը տա դրական արձագանք մարտին:
Ընդլայնման հարցերով եվրահանձնակատար Օլիվեր Վարխելին ասել է, որ երկու երկրները բարեփոխել են իրենց տնտեսությունը, դատական համակարգը եւ պետության մյուս ոլորտները ԵՄ ստանդարտներին համապատասխանելու համար: «Ես հույս ունեմ, որ անդամ պետությունները դրական որոշում կկայացնեն առաջիկա շաբաթների ընթացքում»,-ասել է նա:
ԵՄ անդամ երկրների կառավարությունները պետք է որոշում կայացնեն ընթացիկ ամսվա վերջում: Հաստատման դեպքում կգումարվի ԵՄ առաջնորդների եւ բոլոր վեց թեկնածու երկրների՝ Սերբիայի, Կոսովոյի, Չերնոգորիայի, Ալբանիայի, Բոսնիայի եւ Հյուսիսային Մակեդոնիայի մասնակցությամբ նիստ Զագրեբում մայիսին:
Հոկտեմբերին Մակրոնը հրաժարվել էր հաստատել բանակցությունների մեկնարկը՝ հայտարարելով, որ նոր անդամներ ընդունելու գործընթացն անհրաժեշտ է փոխել:
Փետրվարին Եվրահանձնաժողովն առաջարկել էր բարեփոխել այդ գործընթացը: ԵՄ դիվանագետները հայտարարել էին, որ Դանիան եւ Նիդերլանդները, որոնք սատարել էին Մակրոնին, նույնպես կպակասեցնեն իրենց դիմադրությունը:
