Հայաստանի Կառավարությունն առաջարկում է վավերացնել «Անկախ պետությունների համագործակցության շրջանակում ահաբեկչության եւ ծայրահեղականության այլ բռնի դրսեւորումների, ինչպես նաեւ դրանց ֆինանսավորման դեմ պայքարի ոլորտում տեղեկության փոխանակման մասին» համաձայնագիրը: Այս մասին մարտի 3-ին ԱԺ նիստում համապատասխան օրինագծի քննարկման ժամանակ ասաց Ազգային անվտանգության ծառայության տնօրենի պաշտոնակատար Էդուարդ Մարտիրոսյանը:
Մարտիրոսյանը նշեց, որ այս համաձայնագիրը ստորագրվել է դեռեւս 2017 թվականի նոյեմբերի 3-ին: Նա միաժամանակ նշեց, որ այն վավերացնելով՝ հայկական կողմը որեւէ պարտավորություն չի ստանձնում այն դեպքում, եթե երրորդ կողմին տրամադրվող այս կամ այն տեղեկությունը ի վնաս ազգային եւ պետական շահերի է: Խոսքը, մասնավորապես, Ադրբեջանին տրամադրվող տեղեկության մասին է, որը նույնպես ԱՊՀ անդամ է:
