Ես համարում եմ, որ թիֆլիսահայությունն ապրում է իր հայրենիքում: Այս մասին, այսօր՝ մարտի 3-ին, Թբիլիսիում հայ համայնքի հետ հանդիպման ժամանակ նշեց ՀՀ վարչապետ Նիկոլ Փաշինյանը՝ անդրադառնալով հարցին, թե արդյոք ՀՀ կառավարությունն ունի հայրենադարձության ծրագիր:
«Մենք պետք է շահագրգռված լինենք, որ Վրաստանը լինի ուժեղ, զարգացած, հզոր պետություն: Վրաստանն էլ պետք է շահագրգռված լինի, որ Հայաստանը լինի ուժեղ, զարգացած, հզոր պետություն:
Հիմա մշակվում է Հայրենադարձության մասին օրենք: Մենք այստեղ շատ խնդիրներ ունենք՝ սկսած նրանից, թե մարդը մշտական բնակության գալիս ինչ գույք կարող է բերել իր հետ: Մեր շատ հայրենակիցներ, որ հայրենադարձվում են, այդպիսի խնդիր ունեն: Բայց դա նաեւ ԵՏՄ օրենսդրության կարգավորման հարց է: Պետք է հասկանանք, թե ինչպես այդ խնդիրները լուծենք:
Երբ, օրինակ, 2018-ին ասում էինք, որ հայրենադարձվողներին տանք արտոնություններ, վարկեր, բայց հետո մի հարց ծագեց. ՀՀ քաղաքացիները կարող են ասել՝ չհասկացանք, մենք տարիներով այստեղ ապրում ենք, մեզ չեք տալիս արտոնություն, եկողներին եք տալիս: Այսինքն մենք գնանք դուրս, 4 տարի հետո հետ գանք, որ նույն պայմաններից օգտվե՞նք: Բա որ տանք այդպիսի արտոնություններ, հետո փողոցում մեզ հարցնեն՝ մենք սխա՞լ ենք արել, որ մնացել ենք, չենք արտագաղթել»,-ասաց Փաշինյանը:
Նա ընդգծեց, որ այսօր Հայաստանում ցանկացած ոլորտում լավ մասնագետի պահանջարկ կա. «Լավ մասնագետի պրոբլեմ կա՝ սկսած արհեստավորից: Այսօր լավ արհեստավոր գտնելը դժվար է, որովհետեւ լավ արհեստավորը շատ պատվերներ ունի: Օրինակ ճանապարհների կառուցման ոլորտում պահանջարկ ունենք: Այսօր ճանապարհների կառուցման որակը նախկինի համեմատ շատ բարձր է, բայց հիմա եղած որակից ես էլի գոհ չեմ, այդ որակը պետք է դեռ կրկնակի բարձրանա»:
