Թուրքիայի նախագահ Ռեջեփ Թայիփ Էրդողանն Իդլիբում գործողությունների համար աջակցություն է խնդրել ԱՄՆ նախագահ Դոնալդ Թրամփից, հաղորդում է ՌԻԱ նովոստին:
Ավելի վաղ Սիրիայի հարցերով ԱՄՆ հատուկ ներկայացուցիչ Ջեյմս Ջեֆրին հայտարարել է, որ Վաշինգտոնը պատրաստ է օգնել Անկարային զինամթերքի մատակարարման հարցում:
«Ես նման խնդրանքով դիմել եմ պարոն Թրամփին»,- ասել է Էրդողանը՝ պատասխանելով լրագրողների համապատասխան հարցին:
Իդլիբում իրավիճակը սրվել է այն բանից հետո, երբ փետրվարի 27-ին «Հայաթ Թահրիր աշ Շամի» ահաբեկիչները խոշորամասշտաբ հարձակում են սկսել սիրիական կառավարական զորքերի դիրքերի վրա: Սիրիայի բանակը պատասխան կրակ է բացել: ՌԴ պաշտպանության նախարարության տեղեկություններով՝ գնդակոծության են ենթարկվել այդ թվում նաեւ թուրք զինվորականները, որոնք չպետք է այնտեղ գտնվեին:
Արդյունքում զոհվել է Թուրքիայի բանակի 36 զինվորական, վիրավորվել՝ ավելի քան 30-ը: Թուրք զինվորականների տուժելու մասին տեղեկություններ ստանալուց անմիջապես հետո ռուսական կողմը միջոցներ է ձեռնարկել սիրիական զորքերի կրակի ամբողջական դադարեցման համար, ապահովել է թուրք զոհված եւ վիրավորված զինծառայողների անվտանգ տարհանումը Թուրքիա: ՌԴ ՊՆ-ն նշել է, որ ռուսական ավիացիա չի կիրառվել:
Նույն օրը Անկարան Սիրիայի դեմ «Գարնանային վահան» ռազմական օպերացիա է սկսել: Թուրքական կողմի տեղեկություններով՝ ոչնչացվել է սիրիական 3 ինքնաթիռ, 8 ուղղաթիռ, 3 ԱԹՍ, 151 տանկ, 47 հրետանային արկ, 52 հրթիռային սարքավորում, 8 ՀՕՊ համակարգ, 12 հակատանկային սարքավորում, 51 միավոր զրահատեխնիկա, 60 ռազմական մեքենա, 10 զինամթերք, սպանվել է 3138 սիրիացի զինվորական:
Ավելի վաղ ՌԴ ԱԳ նախարար Սերգեյ Լավրովը հայտարարել է, որ Թուրքիան չի կարողացել կատարել սիրիական Իդլիբի շուրջ իրավիճակի հանգուցալուծման մի քանի առանցքային պարտավորություններ: Մասնավորապես՝ ահաբեկիչներից չի տարանջատել զինված ընդդիմությանը, որը պատրաստ է քաղաքական գործընթացի շրջանակում կառավարության հետ երկխոսության:
Այսպես, 2018 թվականի սեպտեմբերի 18-ի ռուս-թուրքական հուշագրում, որը համաձայնեցվել էր նախագահներ Պուտինի եւ Էրդողանի հանդիպման արդյունքներով, նշված էր թուրք զինվորականների ներկայության ստատուս քվոն պահպանելու մասին, սակայն պայմանով, որ մինչեւ 2018 թվականի հոկտեմբերի 15-ը Իդլիբի ապաէսկալացիայի գոտուց դուրս կբերի բոլոր ահաբեկչական արմատական խմբավորումներին: Նաեւ համաձայնեցվել էր, որ այդ գոտու սահմաններում «արդյունավետ միջոցներ կձեռնարկվեն մարտական գործողությունների դադարեցման կայուն ռեժիմի ապահովման համար»: Հուշագրի 7-րդ կետով նախատեսվում էր այդ շրջանում ռուս-թուրքական համատեղ պարեկում անցկացնել: