Ահաբեկիչները սիրիական Սարաքիբ քաղաքում փորձել են պայթեցնել թունավոր նյութերով տարաները: Այս մասին այսօր լրագրողներին հայտնել են Սիրիայում պատերազմող կողմերի հաշտեցման ռուսական կենտրոնում, փոխանցում է ՏԱՍՍ-ը:
«Սարաքիբ բնակավայրի արեւմտյան թաղամասերում սիրիական կառավարական զորքերի առաջխաղացումը խափանելու եւ հետագայում նրանց կողմից այս տարվա մարտի 2-ին քիմիական զենք կիրառելու մեղադրանքներ առաջադրելու նպատակով մինչեւ 15 մարդուց բաղկացած ահաբեկիչների խումբը գիշերային ժամի նախաձեռնել է թունավոր քիմիական նյութերով լի տարաների հետ միասին ֆուգասային ռազմամթերքի պայթեցման փորձ»,- նշված է հաղորդագրության մեջ:
Կենտրոնից, սակայն, նշել են, որ փորձի եւ թունավոր նյութերի հետ վարվելու հմտությունների պակասի պատճառով զինյալները խախտել են տարաներից մեկի հերմետիկությունը՝ իրենց կողքին արտահոսք թույլ տալով: «Միջադեպի հետեւանքով ահաբեկիչները ստացել են քիմիական ուժեղ թունավորում՝ այդպես էլ չկարողանալով իրագործել ռազմամթերքի պայթեցումը եւ սադրանքի իրականացումը»,- հայտնել են ՌԴ զինվորականները: