Եվրոպան մեծ նշանակություն է տալիս սննդամթերքի անվտանգությանն ու պատրաստ է բարձր գին վճարել էկոլոգիապես մաքուր պարենային ապրանքի համար: Այս մասին մարտի 4-ին Եվրամիության կողմից ֆինանսավորվող «Կանաչ գյուղատնտեսություն» (EU-GAIA) ծրագրի մեկնարկի ժամանակ ասաց ՀՀ-ում ԵՄ պատվիրակության ղեկավար Անդրեա Վիկտորինը:
Նրա խոսքով՝ Հայաստանում մեկնարկած պիլոտային ծրագիրը կգործի դեռ 3 մարզերում, ինչը հնարավորություն կտա ավելի օբյեկտիվորեն գնահատել արդյունքները: «ԵՄ-ը այդ ծրագրի շրջանակում ձգտում է մեծացնել մանր եւ միջին տնտեսվարող սուբյեկտների քանակը, ինչը կարող է արագացենլ տնտեսական զարգացումը, ինչպես նաեւ լուծել զբաղվածության խնդիրը՝ հաշվի առնելով, որ Հայաստանի բնակչության ավելի քան 36 տոկոսը զբաղված է հենց գյուղատնտեսության ոլորտում»,- նշեց նա:
Իր հերթին, Հայաստանի էկոնոմիկայի նախարարի տեղակալ Արման Խոջոյանը նշեց, որ ծրագիրը համապատասխանում է կառավարության ռազմավարությանը տնտեսության մրցունակության բարձրացման եւ գյուղատնտեսության ոլորտում բարձր եկամուտների ապահովման հարցում:
Նշենք, որ Հայաստանում մարտի 4-ին մեկնարկել է 11,7 մլն եվրո բյուջեով Եվրամիության կողմից ֆինանսավորվող «Կանաչ գյուղատնտեսություն» (EU-GAIA) ծրագիրը:
