Իրավիճակը Սիրիայում մշտապես գտնվում է Հայաստանի արտաքին գործերի նախարարության ուշադրության կենտրոնում: Այս մասին մարտի 4-ին ՀՀ Ազգային ժողովի նիստին հայտարարեց ՀՀ արտաքին գործերի նախարար Զոհրաբ Մնացականյանը` պատասխանելով «Բարգավաճ Հայաստան» խմբակցության քարտուղար Արման Աբովյանի հարցին:
Ըստ Մնացականյանի` օգտագործելով իրենց տրամադրության տակ գտնվող բոլոր մեխանիզմները, Հայաստանի արտգործնախարարությունն իրականացնում է իր լիազորություններն իրավիճակը վերլուծելու համար եւ ձեռնարկում է բոլոր անհրաժեշտ քայլերը:
«Մենք անընդհատ կապի մեջ ենք մեր գործընկերների հետ` մեզ մոտ առկա տվյալների ստուգման եւ վերլուծության համար»,- ասաց Մնացականյանը: Նախարարը նաեւ հիշեցրեց պաշտոնական Երեւանի դիրքորոշումը Սիրիայում տիրող իրավիճակի վերաբերյալ. Հայաստանը դատապարտում է թուրքական ռազմական ներխուժումը Սիրիայի հյուսիս-արեւելքում:
Ըստ ՀՀ Արտաքին գործերի նախարարության` ներխուժումը տարածաշրջանային անվտանգության հետագա վատթարացման, քաղաքացիական զոհերի, տեղահանվածների մեծ հոսքի եւ, ի վերջո, նոր հումանիտար ճգնաժամի կհանգեցնի:
Հայաստանի արտգործնախարարության համար հատկապես մտահոգիչ է ազգային եւ կրոնական փոքրամասնությունների շուրջ ստեղծված իրավիճակը: Այս ռազմական ներխուժումը, ինչպես կարծում են Երեւանում, մարդու` նրա ինքնության հիմքով իրավունքների կոպիտ եւ զանգվածային խախտումների վտանգ է ստեղծում:
Հայաստանը կոչ է արել արդյունավետ միջազգային ջանքեր գործադրել այս ռազմական ներխուժումը դադարեցնելու, զանգվածային վայրագությունները կանխելու եւ Թուրքիային մոտ սահմանային բնակչությանը պաշտպանելու համար:
Նախարար Մնացականյանը նաեւ ասաց, որ Հայաստանը պաշտպանում է Սիրիայի ամբողջականությունն ու ինքնիշխանությունը եւ կոչ է անում հրաժարվել երկրի եւ նրա ժողովրդի նկատմամբ ռազմական ոտնձգություններից:
Պաշտոնական Երևանը նաեւ հայտարարեց, որ կշարունակի մարդասիրական օգնություն ցուցաբերել եղբայրական սիրիացի ժողովրդին:
Ըստ ՀՀ ԱԳՆ ղեկավարի` սիրիական ճգնաժամը հնարավոր է լուծվել միայն այն դեպքում, եթե Սիրիայում կա ներքին լայն ներքաղաքական երկխոսություն` հաշվի առնելով բոլոր շահագրգիռ կողմերի շահերը, այդ թվում նաեւ` ազգային եւ կրոնական փոքրամասնությունների:
