News
Լրահոս
News
Ուրբաթ
Մարտ 29
Տեսնել լրահոսը

Ռուս գրող, կինոռեժիսոր, հայագետ, Հայաստանի մասին գրքերի հեղինակ Կիմ Բակշիի մահից հետո անցել է մեկ տարի:

Բակշին ծնվել է 1931 թվականի մարտի 1-ին Մոսկվայում: Ավարտել է Մոսկվայի պետական համալսարանը:

1964 թվականից Կիմ Բակշին զբաղվել է Հայաստանի հնագույն եւ ժամանակակից մշակույթի ուսումնասիրությամբ: Ուսումնասիրել է Երևանի Մատենադարանում, Վենետիկի Սան Լազարո կղզում, Վիեննայում Մխիթարյանների միաբանությունում, Բեյրութի Կիլիկյան կաթողիկոսարանում, Իսֆահանի Սուրբ Քրիստոս Ամենափրկչի տաճարում եւ աշխարհի խոշորագույն գրադարաններում պահվող ձեռագրերը:

Հանրությանը հայոց պատմության, մշակույթի, ժողովրդի հոգեւոր արժեքների, նրա բազմադարյան ավանդույթների, հրաշալի բնության, հոյակերտ հուշարձանների հետ ծանոթացնելը դարձել էր նրա առաքելությունը։ Հայ-ռուսական բարեկամության եւ մշակութային կապերի ամրապնդման ու զարգացման իր բազմամյա գործունեության համար Կիմ Բակշին արժանացել է Հայաստանի պետական պարգեւի՝ Պատվո շքանշանի: Նա ՀՀ Պետական մրցանակի, ՀՀ գրողների միության Հովհաննես Թումանյանի անվան մրցանակի, «Հայ ժողովրդի բարեկամ» մրցանակի դափնեկիրն է: Նա նաեւ ստացել է Մովսես Խորենացու անվան մեդալ (2001), պարգեւատրվել է Հայ-ռուսական սլավոնական համալսարանի «Պատվավոր շքանշանով» (2006): Բակշին «Կարպիս Փափազյան» մրցանակի դափնեկիր է: Ռուսաստանի հայերի միությունը նրան պարգեւատրել է «Արծաթե խաչով», ավելի ուշ՝ «Ոսկե խաչով»:

Կիմ Բակշին իր կյանքի ավելի քան 50 տարին նվիրել է հայկական մշակույթի եւ պատմության ուսումնասիրությանը: Նա «Մատենադարան» 20 սերիանոց ֆիլմի սցենարի հեղինակն է, որը պարգեւատրվել է Հայաստանի պետական մրցանակով: Ըստ հանգուցյալի վերջին կամքի՝ գրողի աճյունի  մի մասը հանգրվան է գտել Գառնիում եւ Շուշիում, եւ սա Բակշիի՝ Հայաստանի հանդեպ սիրո եւս մեկ ապացույց է:

«Արցախի հոգևոր գանձերը» վերջին գրքի ճակատագիրը

Ըստ Կիմ Բակշիի ընկեր եւ հրապարախոս Սուրեն Սարգսյանի` «Արցախի հոգեւոր գանձերը» գիրքը լույս է տեսել 2012 թվականին ռուսերեն լեզվով, 2015-ին` հայերեն: Արցախի բյուջեից նյութերի հավաքագրման համար 8 հազար դոլար էր հատկացվել: Բակշին, չնայած լուրջ հիվանդությանը եւ վիրահատությանը, ավարտել էր աշխատանքը: Գիրքը հրատարակվել է: Սակայն հայերեն լեզվով տպաքանակի մի մասը մնացել է չիրացված, ինչը մեծապես տխրեցնում էր հեղինակին:

«Գրողի ընկերները` Հայաստանի ժողովրդավարական կուսակցության նախագահ Արամ Գ. Սարգսյանը, գրող Զորի Բալայանը, Կոմիտասի պետական ​​քառյակի ղեկավար Էդուարդ Թադեւոսյանը, Սոս Սարգսյանի այրին` Նելլի Սարգսյանը, նամակ են հղել հայտնի բարերարներին` մեր ռուս հայրենակիցներ Ռուբեն Վարդանյանին եւ Սամվել Կարապետյանին, տպաքանակը իրացնելու խնդրանքով: Մնացել է ընդամենը 400 օրինակ, դրանք արժեքավոր նվեր կդառնան հայկական մշակույթով հետաքրքրվողների համար, եւ դա հարգանքի տուրք կդառնա գրողի մահվան տարելիցին, որն այդքան բան է արել է ի նպաստ հայերի»,- նշել է Սարգսյանը: Հրապարակախոսը նշել է, որ Ռուբեն Վարդանյանին եւ Սամվել Կարապետյանին ուղղված կոչը պատահական չէ. «Մենք լավ գիտենք նրանց բարի գործերը: Ի դեպ, Ս. Կարապետյանը Կարոտ փառատոնի գլխավոր հովանավորն էր, որի ընթացքում Կիմ Բակշին պարգեւատրվել էր հուշամեդալով (N27)` հայկական մշակույթի առաջխաղացման գործում ունեցած բացառիկ ավանդի համար»:

!
Այս նյութը հասանելի է նաև   Русский
Տպել
Ամենաշատ