Միացյալ Նահանգները ողջունում է Ռուսաստանի եւ Թուրքիայի առաջնորդների պայմանավորվածությունները սիրիական Իդլիբ նահանգում տիրող իրավիճակի վերաբերյալ եւ հուսով են, որ դրանք կօգնեն իրավիճակի բարելավմանը: Այս մասին ՏԱՍՍ-ին հայտարարել է ԱՄՆ պետդեպարտամենտի պաշտոնական ներկայացուցիչը:
«Մենք ողջունում ենք Թուրքիայի եւ Ռուսաստանի միջեւ Իդլիբում հրադադարի վերաբերյալ համաձայնագրերի մասին այսօրվա լուրերը: Հուսով ենք, որ դրանք կօգնեն ծայրահեղ վտանգավոր իրավիճակի դեէսկալացմանը եւ ծանր հումանիտար ճգնաժամի թեթեւացմանը»,- ասել է նա:
«Միացյալ Նահանգներն անհամբեր սպասում են զարգացումների մանրամասների քննարկմանը ՆԱՏՕ-ի ձեւաչափում իր դաշնակից Թուրքիայի հետ, որը ձգտում է երկարատեւ հրադադարի հաստատմանը: Այժմ չափազանց կարևոր է այն, թե ինչ գործողություններ կձեռնարկի հենց պատերազմի գոտում [Սիրիայի նախագահ Բաշար] Ասադը եւ նրա աջակիցները: Սա ցույց կտա` արդյոք կհաջողվի հասնել հարատեւ հրադադարի»,- հավելել է Պետդեպարտամենտի ներկայացուցիչը:
«Այս հակամարտության լուծման միակ ճանապարհը հրադադարի հաստատումն է ամբողջ երկրում եւ բանակցությունների միջոցով քաղաքական լուծումը` ՄԱԿ-ի Անվտանգության խորհրդի 2254 բանաձեւի համաձայն»,- ասել է ԱՄՆ արտաքին գործերի նախարարության ներկայացուցիչը:
Ռուսաստանի նախագահ Վլադիմիր Պուտինն ու Թուրքիայի ղեկավար Թայիփ Էրդողանը հինգշաբթի օրը Մոսկվայում կայացած բանակցությունների ընթացքում պայմանավորվել են հրադադարի եւ մի շարք այլ միջոցառումների մասին, որոնք ուղղված են իրավիճակի կարգավորմանը սիրիական Իդլիբ նահանգում: Նրանց կողմից ձեռք բերված պայմանավորվածությունները նախատեսում են, որ Իդլիբում ռազմական գործողությունները շփման ողջ երկայնքով դադարեցվելու են մարտի 6-ին: Մարտի 15-ից Ռուսաստանի Դաշնությունն ու Թուրքիան կսկսեն համատեղ պարեկային ծառայությունները M4 մայրուղու վրա, որի երկայնքով անվտանգության միջանցք կստեղծվի: Մոսկվան եւ Անկարան վերահաստատել են իրենց աջակցությունը Սիրիայի ինքնիշխանությունը պահպանելու վերաբերյալ եւ պայմանավորվել են շարունակել վճռական պայքարը ահաբեկչության դեմ: