Միացյալ Նահանգները կշարունակեն տնտեսական եւ դիվանագիտական ճնշումները սիրիական իշխանությունների, ինչպես նաեւ Ռուսաստանի եւ Իրանի վրա` Սիրիայի հարցում փոխզիջումային լուծման հասնելու նպատակով: Այս հայտարարությունն արվել է Սիրիայի հարցերով ԱՄՆ հատուկ ներկայացուցիչ Զեյմս Զեֆրիի կողմից հինգշաբթի օրը CNN-ին տված հարցազրույցում:
«Բանակցային կարգավորման հասնելու համար միջոցների կիրառման հարցում մեր հիմնական գործիքը շարունակում է մնալ տնտեսական եւ դիվանագիտական ճնշումը,- ասել է Զեֆրին:- Խոսքը Սիրիայի նախագահ Բաշար Ասադի ռեժիմի մեկուսացման մասին է, ինչպես նաեւ` մեր պատժամիջոցների քաղաքականության եւ հրաժարման աջակցել վերակառուցմանը [հետպատերազմյան] ` ռեժիմի եւ նրա կողմնակիցների` Ռուսաստանի եւ Իրանի վրա ճնշում գործադրելու նպատակով»: Սիրիայի հարցով ԱՄՆ-ի հատուկ ներկայացուցչի խոսքով` այս մոտեցումը պետք է հանգեցնի նրան, որ հակամարտության կարգավորման մեջ «փոխզիջումային արդյունք» ձեռք կբերվի, փոխանցում է ՏԱՍՍ-ը:
Դեկտեմբերին ԱՄՆ Կոնգրեսի Սենատի արտաքին հարաբերությունների հանձնաժողովը հաստատել է Ռուսաստանի ֆիզիկական եւ իրավաբանական անձանց կողմից Սիրիայի կառավարությանը աջակցության համար սահմանափակումներ նախատեսող օրինագիծը: Հաջորդ փուլը փաստաթուղթը Սենատում քննարկելն է, որտեղ դրանում կարող են փոփոխություններ մտցվել: