Հարցի երկարաժամկետ լուծման համար պետք են լուրջ նախադրյալներ, օրինակ՝ Իդլիբի լիարժեք ազատագրում, իսկ դրա համար պետք է կանխատեսելիություն ցամաքում, այն դեպքում, երբ Սիրիայում դեռ գործում են ակտիվ ուժեր, որոնք ժամանակ առ ժամանակ սրում են իրավիճակը: Այս մասին NEWS.am-ի հետ զրույցում ասաց արաբագետ Սարգիս Գրիգորյանը:
Նրա խոսքով՝ լոկալ առումով բանակցությունների արդյունքներից վկայում է, որ լայնամասշտաբ ռազմական գործողություններ չեն լինի:
«Թուրքիան այդ բանակցությունների գլխավոր նախաձեռնողը դարձավ՝ մեծացնելով Իդլիբում իր ներկայությունը: Բացի այդ, Անկարան հնարավորություն ստացավ պարեկում անցկացնել, ինչն էլ ավելի է մեծացնում Իդլիբում նրա ազդեցությունը: Ռուսաստանը եւս մեծացրել է իր ազդեցությունը՝ հաշվի առնելով այն, որ կառավարական զորքերը հսկողության տակ են առել ռազմավարական նշանակություն ունեցող կարեւոր օբյեկտներ եւ վերահսկողություն սահմանել ինչպես M4 մայրուղում, այնպես էլ դեպի Հալեպ տանող Մ5 մայրուղում»,- հավելեց նա:
Ռուսաստանի նախագահ Վլադիմիր Պուտինն ու Թուրքիայի ղեկավար Թայիփ Էրդողանը հինգշաբթի օրը Մոսկվայում կայացած բանակցությունների ընթացքում պայմանավորվել են հրադադարի եւ մի շարք այլ միջոցառումների մասին, որոնք ուղղված են իրավիճակի կարգավորմանը սիրիական Իդլիբ նահանգում: Նրանց կողմից ձեռք բերված պայմանավորվածությունները նախատեսում են, որ Իդլիբում ռազմական գործողությունները շփման ողջ երկայնքով դադարեցվելու են մարտի 6-ին: Մարտի 15-ից Ռուսաստանի Դաշնությունն ու Թուրքիան կսկսեն համատեղ պարեկային ծառայությունները M4 մայրուղու վրա, որի երկայնքով անվտանգության միջանցք կստեղծվի: Մոսկվան եւ Անկարան վերահաստատել են իրենց աջակցությունը Սիրիայի ինքնիշխանությունը պահպանելու վերաբերյալ եւ պայմանավորվել են շարունակել վճռական պայքարը ահաբեկչության դեմ:
