Ես իմ գործընկերների հետ միասին նախընտրական քարոզարշավ եմ անցկացրել Երեւանում եւ չեմ նկատել, որ քաղաքացիներն ընդհանրապես ոչինչ չիմանային առաջիկա հանրաքվեի մասին: Այս մասին այսօր` մարտի 9-ին, ՀՀ Ազգային ժողովում տեղի ունեցած ավանդական ճեպազրույցի ժամանակ ասաց իշխող «Իմ քայլը» դաշինքի պատգամավոր Սուրեն Գրիգորյանը: Միեւնույն ժամանակ, նա խոստովանեց, որ մեկ կամ երկու մարդ տեղեկացված չէին գալիք հանրաքվեի մասին, եւ իրենք ստիպված էին պարզաբանել իրավիճակն այդ քաղաքացիների համար:
Հիշեցնենք, որ ապրիլի 5-ին Հայաստանում նշանակված է Սահմանադրության մեկ հոդվածի հանրաքվե: Իշխանություններն առաջարկել են վաղաժամկետ դադարեցնել Սահմանադրական դատարանի 7 եւ 9 անդամների լիազորությունները, այդ թվում՝ ՍԴ նախագահի, նրանց անվանելով նախկին «ռեժիմի» ներկայացուցիչներ: Փաստացի բոլոր քաղաքական ուժերը, բացի իշխող «Իմ քայլը» դաշինքից եւ նախկին նախագահ Լեւոն Տեր-Պետրոսյանի Հայ ազգային կոնգրեսից, հրաժարվել են այս գործընթացին մասնակցելուց՝ այն անվանելով, մեղմ ասած, իրավաբանորեն խոցելի: Պատասխանը հաստատական կհամարվի ոչ միայն քվեարկածների կեսի «ԱՅՈ» ասելու դեպքում, այլեւ ընտրացուցակների մեջ մտած ընտրողների ոչ պակաս քառորդ մասի, այսինքն՝ մոտ 650 հազար մարդու:
