Ռուսաստանի Դաշնության ռազմական պատվիրակության մասնակցությամբ բանակցություններն Իդլիբի դեէսկալացիոն գոտում տիրող իրավիճակի վերաբերյալ կսկսվեն մարտի 10-ին Անկարայում: Այս մասին նշվում է Թուրքիայի ազգային պաշտպանության նախարարության տարածած հայտարարության մեջ, փոխանցում է ՏԱՍՍ-ը:
«Մոսկովյան հուշագրի [Իդլիբի մասին] համաձայն` Մարտի 10-ին Անկարայում կսկսվեն բանակցությունները Ռուսաստանի ռազմական պատվիրակության մասնակցությամբ»,- նշվում է հաղորդագրության մեջ:
Սպասվում է, որ կողմերը կքննարկեն Սիրիայում Մ-4 մայրուղու վրա համատեղ պարեկության մանրամասները, որի մեկնարկը նախատեսված է մարտի 15-ին:
Ռուսաստանի Դաշնության եւ Թուրքիայի նախագահներ Վլադիմիր Պուտինը եւ Թայիփ Էրդողանը մարտի 5-ին Մոսկվայում կայացած բանակցություններում պայմանավորվել են հրադադարի հաստատման եւ մի շարք այլ միջոցառումների մասին, որոնք ուղղված են իրավիճակի կարգավորմանը Իդլիբում: Նրանց կողմից ձեռք բերված պայմանավորվածությունները նախատեսում են, որ այս տարածաշրջանում ռազմական գործողությունները դադարեցվելու են շփման գծի ողջ երկայնքով` մարտի 6-ին հրադադարի ուժի մեջ մտնելուց հետո:
Մարտի 15-ից Ռուսաստանի Դաշնությունը եւ Թուրքիան համատեղ պարեկություն կիրականացնեն Մ-4 մայրուղու վրա, որի երկայնքով անվտանգության միջանցք կստեղծվի: Մոսկվան եւ Անկարան վերահաստատել են իրենց` Սիրիայի ինքնիշխանության պահպանմանն ուղղված հանձնառությունը եւ պայմանավորվել են շարունակել վճռական պայքարը ահաբեկչության դեմ: