Եթե այս իշխանությունը լեգիտիմ է, ապա այս երկու տարվա ընթացքում իրենց համակիրների բանակը ոչ թե պետք է պակասեր, այլ՝ ավելանար։ Այս մասին այսօր լրագրողների հետ հանդիպման ժամանակ ասաց հոգեբան Միհրդատ Մադաթյանը՝ անդրադառնալով սահմանադրական փոփոխությունների հանրաքվեի «Այո» կողմի քարոզարշավի և իշխանության վարած քաղաքականության թեմային։
«Այս հանրաքվե ասվածը պետք է առանց մեծ դժվարության անցներ, բայց ինչպես տեսնում ենք՝ իշխող ուժերն այս առումով լուրջ վտանգներ են զգում։ Հետաքրքիրն այն է, որ ասում են՝ այս սահմանադրական փոփոխությունները ժողովրդի պահանջով է դրվել որպես օրակարգային հարց, բայց կարծես, թե վարչապետն այնքան խիստ է անհանգստացած, որ ինքն է սկսել բուկլետներ բաժանել, դա ինքն իրենով ապօրինի գործընթաց է»։
Հոգեբանի կարծիքով` նույնիսկ քաղաքական ուժերի կողմից «Ոչ»-ի շտաբ չձևավորելը խոսում է այն մասին, որ «Այո»-ի գաղափարը ի սկզբանե պարտության է մատնվելու. «Ամեն դեպքում կարծում եմ, որ մարտ ամսվա վերջին իրավիճակն ավելի կսրվի, կլարվի, որովհետև Արցախում ևս ընտրություններ կան»։
Վարչապետի կողմից մետրոյում բուկլետներ բաժանելուն անդրադառնալով` Մադաթյանը նշեց, որ ինքը դրան ժողովրդավարություն չէր անվանի. «Ես սրան դեմոկրատիա չէի անվանի, հատկապես այն դեպքում, երբ այս քայլերը համեմվում են կամրջից նետվողին փրկելու կամ այլ շոուներով, սա արդեն դարձել է շինծու օրակարգ»։
Հոգեբանի խոսքով` այսօր իշխանությունը չգիտի, թե ում դեմ և ինչի համար է պայքարում։
«Քաղաքացիների 90 տոկոսը չգիտի, թե ինչին է «Այո» քվեարկելու, և իշխանությունը, բոլոր գործերը թողած, ահռելի գումարներ է ծախսում, որ հանրաքվեն տեղի ունենա։ Շեշտը դրված է հներին մերժելու վրա, բայց հները ոչինչ չեն ասում այս մասին, հներն ուղղակի ասում են, որ սա պարզապես ապօրինի գործընթաց է»,-ասաց նա։