Ատոմային էներգիայի միջազգային գործակալությունը Համատեղ համընդգրկուն գործողությունների պայմանագրի հարցով Իրանի համագործակցության մակարդկում որեւէ փոփոխություն չի գրանցել։ Այս մասին գործակալության կառավարիչների նիստում, որը կայացել է Վիեննայում, հայտարարել է ԱԷՄԳ-ի գլխավոր տնօրեն Ռաֆայել Գրոսին, հայտնում է ԻՌՆԱ-ն։
Գրոսին կոչ է արել Իրանին հասանելիություն տրամադրել չհայտարարված միջուկային նյութերի հնարավոր պահպանման օբյեկտներին։ Գրոսին հիշեցրել է, որ ԱԷՄԳ-ը երկու օբյեկտների հասանելիության հայտ է ներկայացրել, սակայն Իրանը չի տրամադրել հասանելիություն այդ օբյեկտներին եւ չի մասնակցել գործակալության հարցերի պարզաբանման համար բանակցություններին։ «Դա բացասաբար է անդրադառնում այդ հարցերը հստակեցնելու եւ լուծելու գործակալության ունակությունների վրա։ Ես կոչ եմ անում Իրանին անհապաղ եւ լիարժեք համագործակցել գործակալության հետ, այդ թվում ապահովել գործակալության կողմից նշված օբյեկտների արագ հասանելիությունը»,- ասել է Գրոսին։
Նա ընդգծել է, որ գործակալությունը շարունակում է հետեւել, որ Իրանի կողմից հայտարարված միջուկային նյութերը, Երաշխիքների համաձայնագրի համաձայն, այլ նպատակներով չօգտագործվեն։
Ավելի վաղ Վիեննայում միջազգային կազմակերպություններում Իրանի ներկայացուցիչն ասել էր, որ Թեհրանը պարտավոր չէ դիտարկել իր միջուկային օբյեկտներին հասանելիություն տրամադրելու ԱԷՄԳ-ի խնդրանքը, որը հիմնված է կեղծ տեղեկատվության վրա։ Նրա խոսքերով՝ ԱՄՆ-ը եւ Իսրայելը փորձում են ճնշում գործադրել ԱԷՄԳ-ի վրա։