Apple Watch-ը կորոշի արյան մեջ թթվածնի մակարդակը։ Գործառույթը օգտատերերի առողջության համար այլ պոտենցիալ վտանգներ էլ կհայտնաբերի, հայտնում է HighTech-ը։

Apple-ում 9to5Mac թերթի աղբյուրները հայտարարել են, թե ընկերությունը աշխատում է մի գործառույթի վրա, որը թույլ կտա դաստակի միջոցով որոշել արյան մեջ թթվածնի մակարդակը։ Եթե թթվածնով արյան հագեցվածության մակարդակը իջնի որոշակի շեմից, օգտատերը այդ մասին ծանուցում կստանա։

Դեռեւս հայտնի չէ՝ կպահանջվի՞արդյոք դրա համար սարքի կամ ծրագրային ապահովման թարմացում։ Հնարավոր է՝ ինժեներները օգտագործեն կարմիր եւ ինֆրակարմիր հաղորդիչներ։

Սարքը թթվածնի մակարդակը նորմալ կհամարի, եթե այն 95-100 տոկոսի սահմաններում լինի։ 80 տոկոսից ցածր մակարդակը կհամարվի վտանգ, որը կարող է սրտի եւ ուղեղի աշխատանքի խափանման պատճառ դառնալ։ Այն դեպքում, եթե նման մակարդակը պահպանվի, ապա սարքը կտեղեկացնի շնչառության կամ սրտի կանգի վտանգի մասին։