Երբ ես փողոցով քայլում եմ, տասնյակ մարդիկ են մոտենում դատարանների կողմից անարդար որոշումների խնդիրներով ու ես չգիտեմ ինչ անեմ: Այս մասին, ասյօր՝ մարտի 10-ին, Քաջարանում «Այո»-ի քարոզարշավի ժամանակ նշեց ՀՀ վարչապետ Նիկոլ Փաշինյանը:
«Վարչապետի պատասխանատվությունն առանց այդ էլ մեծ է, ես չեմ ուզում կրել նաեւ դատական համակարգի գործունեության, ՍԴ-ի գործունեության պատասխանատվությունը, որովհետեւ այսօր հին ավանդույթով դատարաններում ինչ տեղի է ունենում, դրա պատասխանատվությունն էլի ընկնում է վարչապետի, կառավարության վրա:
Մեզ պետք է այնպիսի դատական համակարգ, որ երբ դատարանը որոշի, մենք ասենք, եթե դատարանն այդպես է որոշել, ուրեմն ճիշտ է:
Մեզ մոտ երբ դատարանը որեւէ որոշում է կայացնում, բոլորը մտածում են՝ ով ում որտեղ առավ ու ծախեց: Սա ինստիտուցիոնալ խնդիր է ՀՀ-ում: Այսօր ՀՀ-ում ՍԴ-ն չունի վստահություն: Երկրում չի կարող լինել որեւէ իշխանության օղակ, պետական մարմին, որը ոչ միայն չունի ժողովրդի վստահությունը, այլեւ ժողովուրդն արհամարհանք է տածում այդ մարմնի նկատմամբ»,-ասաց Փաշինյանը:
Նա ընդգծեց, որ իրենք այսօր ՍԴ ինստիտուտի լինելիության, փրկության հարցն են լուծում. «Մենք Սերժ Սարգսյանի ՍԴ-ին ապրիլի 5-ին պետք է ուղարկենք Սերժ Սարգսյանի հետեւից»: