Ռուսաստանի նախագահ Վլադիմիր Պուտինը հավանության է արժանացրել կրկին ընտրություններին մասնակցելու հնարավորության վերաբերյալ ուղղումը, փոխանցում է Gazeta-ն:
Ընդ որում՝ նա անհրաժեշտ է համարել ուղղումը համաձայնեցնել Սահմանադրական դատարանի հետ: Նրա խոսքով՝ եթե ՌԴ Սահմանադրական դատարանը եզրակացություն տա, որ Պուտինի կրկին ընտրվելու հնարավորության մասին ուղղումը համապատասխանում է Հիմնական օրենքին, միայն այդ ժամանակ է հնարավոր նախագահի պաշտոնում իր աշխատանքը շարունակելը:
Ընդ որում՝ Պուտինը Պետդումայի արտահերթ ընտրությունների անհրաժեշտություն չի տեսնում: ՌԼԴԿ առաջնորդ Վլադիմիր Ժիրինովսկին ավելի վաղ առաջարկել էր Հիմնական օրենքում փոփոխությունների ընդունումից հետո անցկացնել արտահերթ խորհրդարանական ընտրություններ: «Բնական է, որ վերջնարդյունքում դա ձեր որոշումն է: Բայց եթե այս հարցում խորհրդարանում կոնսենսուս չկա, իսկ դա, ինչպես ինձ ասաց Պետդումայի նախագահը (Վոլոդինը - խմբ.), չկա, ապա ես Պետական դումայի արտահերթ ընտրությունների անհրաժեշտություն չեմ տեսնում»,- ասել է ՌԴ նախագահը՝ ելույթ ունենալով ՌԴ խորհրդարանի ստորին պալատում, հայտնում է «ՌԻԱ Նովոստի»-ն:
Նա նաեւ նպատակահարմար չի համարել Սահմանադրությունից նախագահական ժամկետների թվի սահմանափակումը հանելու առաջարկը: Այս նախաձեռնությամբ երեքշաբթի հանդես է եկել «Եդինայա Ռոսիա»-ի պատգամավոր Վալենտինա Տերեշկովան: «Այն ժամանակ, երբ երկիրը դեռեւս շատ խնդիրներ ունի, բայց երբ քաղաքական, տնտեսական, սոցիալական ոլորտները ձեռք են բերում ներքին կայունություն, հասունություն, երբ պետությունը դառնում է, անկասկած, ավելի հզոր եւ դրսից դժվար խոցելի, այդ ժամանակ, անկասկած, առաջին պլան է մղվում հենց իշխանության փոփոխելիության հնարավորությունը: Այն անհրաժեշտ է երկրի զարգացման դինամիկայի համար»,- ասել է ՌԴ նախագահը:
Նա ընդգծել է, որ «երկարաժամկետ հեռանկարում» հանրությունը պետք է իշխանության պարբերական փոփոխության երաշխիքներ ունենա: «Մենք պետք է ձեզ հետ միասին մտածենք ապագա սերունդների մասին»,- հավելել է պետության ղեկավարը:
