Երկրները, որտեղ նոր կորոնավիրուսը չի հայտնաբերվել կամ 10-ից քիչ դեպք է հայտնաբերվել, պետք է անհրաժեշտ ամեն բան անեն, որպեսզի թույլ չտան իրենց մոտ COVID-19-ի բռնկում, Ժնեւում հրավիրված ճեպազրույցում հայտարարել է Առողջապահության համաշխարհային կազմակերպության գլխավոր տնօրեն Թեդրոս Ադհան Գեբրեյեսուսը, հայտնում է ՌԻԱ Նովոստին։
«Աշխարհի 81 երկրներում նոր կորոնավիրուսի ոչ մի դեպք չկա, այդ պատճառով նրանք պետք է ամեն ինչ անեն, որպեսզի կանխեն նույնիսկ մեկ վարակման մուտքը։ Նրանք չպետք է թույլ տան այդ վիրուսի հայտնվելու հնարավորությունն իրենց երկրում։ Կան նաեւ 57 երկրներ, որոնք հայտնել են 10 կամ ավելի քիչ դեպքերի մասին։ Նրանք կարող են դադարեցնել այն ամենասկզբում»,- ասել է նա։
ԱՀԿ տնօրենը ընդգծել է, որ վիրուսի զսպման հարցում երկրների գործողությունները պետք է շատ խիստ լինեն։
ԱՀԿ-ն չորեքշաբթի օրը հայտարարել է աշխարհում նոր կորոնավիրուսի վարակման համաճարակի մասին։ Մարտի 11-ի դրությամբ վարակվածների ընդհանուր թիվը կազմել է 118 000 մարդ՝ 114 երկրներում, մահացել է 4291 մարդ։